आगामी असोज १७ गतेबाट प्रदर्शन हुन लागेको फिल्म ‘बेहुली फ्रम मेघौली’को टिजर सार्वजनिक गरिएको छ । युट्युबमा सार्वजनिक गरिएको साढे २ मिनेटको टिजरमा छिोरीको विवाहका लागि एउटा परिवारले केटा खोज्न गरेको संघर्षलाई रोचक शैलीमा देखाइएको छ । ३० वर्षकी स्वस्तिमा खड्कालाई परिवारबाट बिहेको दबाब बढेको छ । परिवारले विभिन्न केटा देखाउँछन् । कोही उमेरले ज्यादा त कोही भर्खर सुधार केन्द्रबाट निस्किएका । केटा नं. ३ अर्थात् ‘अष्ट्रेलिया रिटर्न्स’ निश्चल बस्नेतसँग भने स्वस्तिमाको माया बस्छ । के निश्चलसँगै स्वस्तिमाको बिहेबारी होला ? टिजरले यही कौतुहलता जगाउँदै बिट मारेको छ । टिजरमा केही पञ्चलाइन रसिला छन् ।
साजन काफ्ले र आकाश बरालको लेखन तथा निर्देशन रहेको यो फिल्ममा निश्चल र स्वस्तिमाको अलावा विजय बराल, सिरु बिष्ट, सिम्रन खड्का, आमिर गौतम, बसुन्धरा भुषाल, लोकेन्द्र लेखक, रक्षा थापा, शिशिर सिवाकोटी, टीका पहारी, लुनिभा तुलाधर लगायतको अभिनय छ । फिल्मलाइ स्वस्तिमा र निश्चल दम्पतीले निर्माण गरेका हुन ।
फिल्ममा नरेन्द्र मैनालीको छायांकन, प्रदीप लामा र केवीका खत्रीको नृत्य निर्देशन, जयन जे वाइवा र कुशल पोखरेलको संगीत तथा निमेष श्रेष्ठको सम्पादन रहेको छ । फिल्मको यसअघि तीनवटा गीत सार्वजनिक भइसकेका छन् । एक हप्ताअघि आएको ‘छड्के सलाम’ बोलको गीतले भने राम्रो चर्चा बटुलिरहेको छ । गीतलाई २४ लाख बढीले हेरिसकेका छन् ।