गायक तथा गीतकार बाबुराम पन्थीको स्वरमा नयाँ गीत ‘आमा बाँचिराखे है’ सार्वजनिक भएको छ। आमाप्रतिको माया, सम्मान र भावनात्मक सम्बन्धलाई मुख्य विषय बनाइएको गीतले आमाको महत्त्व र सन्तानसँगको आत्मीयतालाई प्रस्तुत गरेको छ।

पन्थीकै शब्द रहेको गीतमा सूर्य न्यौपानेले सङ्गीत दिएका छन्। महेन्द्र भण्डारीको सङ्गीत संयोजन रहेको गीतको ध्वनि मिश्रण तथा सम्पादन खडक बाजुरालीले गरेका हुन्।

गीतको भिडियोमा हिउँवाला गौतम, आशिष प्रताप जंग, झविन्द्र पौड्याल र सुरेश अर्यालले अभिनय गरेका छन्। आमालाई केन्द्रमा राखेर तयार पारिएको गीतले पारिवारिक सम्बन्ध र आमाप्रतिको प्रेमलाई सङ्गीतमार्फत अभिव्यक्त गर्ने प्रयास गरेको छ।

बाबुराम पन्थीका यसअघि ‘बटौलीमा’, ‘नरोऊ बिन्ती छ’, ‘फूलपाती’, ‘मैलो चोली धुन्न नभन’, ‘जोडशङ्ख फुकेर’, ‘आमा बिनाको दशैँ’, ‘गुल्मी हो नाम’, ‘गुल्मेलीको बस्ती’, ‘उकालो चढ्दै पिरती’, ‘मनै छैन र’ र ‘हिजो रातभरि देखेँ’ लगायतका गीत सार्वजनिक भइसकेका छन्।

नयाँ गीत ‘आमा बाँचिराखे है’ मार्फत पन्थीले आमाप्रतिको स्नेह र भावनालाई श्रोतामाझ पुर्‍याएका छन्।