दशैंको फूलपातीको अवसर पारेर प्रदर्शनमा आउन लागेको नेपाली चलचित्र ‘छ माया छपक्कै २’को ट्रेलर सार्वजनिक भएको छ । निर्माण टिमले सार्वजनिक गरेको ४ मिनेट १८ सेकेन्ड लामो ट्रेलरले चलचित्रको कथावस्तुबारे संकेत गरेको छ ।

ट्रेलरमा अभिनेता दीपकराज गिरी बाइक राइडरको भूमिकामा देखिएका छन् । उमेर ढल्किँदै गएको पात्रले दुई श्रीमतीसँगको वैवाहिक जीवनमा भोग्नुपर्ने परिस्थितिलाई चलचित्रको मुख्य कथावस्तु बनाइएको देखिन्छ । पारिवारिक सम्बन्ध, प्रेम र वैवाहिक जीवनमा आउने उतारचढावलाई हास्यरसमा प्रस्तुत गरिएको चलचित्रले दर्शकलाई मनोरञ्जन दिने अपेक्षा गरिएको छ ।

चलचित्रमा दीपकराज गिरीसँगै दीपाश्री निरौला, केकी अधिकारी र सनिशा भट्टराई मुख्य भूमिकामा छन् । यसैगरी प्रकाश घिमिरे, रमा थपलिया, निर्मल शर्मा, मेक्सम गौडेल, नवीन लम्साल, विष्णु सापकोटा, रवीन्द्र झा, रजनी केसी र कर्मा शाक्यलगायत कलाकारको पनि अभिनय रहेको छ ।

दीपेन्द्र लामाको निर्देशनमा बनेको चलचित्रको कथा, पटकथा तथा संवाद दीपकराज गिरीले लेखेका हुन् । चलचित्रमा दीपाश्री निरौलाले सल्लाहकारको भूमिका निर्वाह गरेकी छन् ।

आमा सरस्वती मुभिज र रोहित अधिकारी फिल्म्सको ब्यानरमा निर्माण भएको चलचित्रलाई आईएमईले पनि प्रस्तुत गरेको छ । चलचित्र असोज ३१ गते दशैंको फूलपातीका दिनदेखि प्रदर्शनमा आउने जनाइएको छ ।

चलचित्रको छायांकन सुशन प्रजापति र आलोक शुक्लाले गरेका छन् भने सम्पादन विपिन मल्लको रहेको छ । चलचित्रको नेपाल वितरण एप्पल इन्टरटेनमेन्ट, एफडी कम्पनी र रिच इन्टरटेनमेन्टले गर्नेछन् ।