प्रदर्शनको तीन दिनअघि सार्वजनिक भएको नेपाली चलचित्र ‘१२ गाउँ २’को ट्रेलरले आलोचनात्मक प्रतिक्रिया पाएपछि अभिनेता तथा निर्देशक विराज भट्टलाई झट्का लागेको छ । अघिल्लो चलचित्र ब्लकबस्टर बनेकाले यसको सिक्वेलप्रति दर्शकको अपेक्षा उच्च थियो ।

मेकिङमा आत्मविश्वास देखाएका विराजले चलचित्रको प्रचारमा कम समय दिएका थिए । तर, मंगलबार सार्वजनिक ट्रेलरका केही दृश्यलाई लिएर दर्शकले असन्तुष्टि जनाएका छन् । ट्रेलरमा एक्सनका दृश्यलाई प्राथमिकता दिइएको छ भने अभिनेता अनुपविक्रम शाही खलपात्रको भूमिकामा देखिएका छन् ।

अनुपविक्रमलाई मुस्लिम पात्रको लुक्स दिन प्रयोग गरिएको नक्कली दाह्री र जुँगालाई लिएर सामाजिक सञ्जालमा चर्चा भइरहेको छ । यही दृश्यका कारण ‘१२ गाउँ २’को तुलना अभिनेता पल शाहको चलचित्र ‘रावायण’सँग हुन थालेको हो । ‘रावायण’मा पनि पल शाहको नक्कली दाह्री अस्वाभाविक देखिएको भन्दै आलोचना भएको थियो ।

‘१२ गाउँ २’को ट्रेलरमा अनुपविक्रमको दाह्री स्वाभाविक नदेखिएको भन्दै कतिपय दर्शकले प्रतिक्रिया दिएका छन् । चलचित्रको मेकिङ र पात्रको लुक्सलाई लिएर उठेका प्रश्नले प्रदर्शनअघि नै फिल्मको चर्चा प्रभावित पार्न सक्ने देखिएको छ ।

दशैंको अवसरमा प्रदर्शनमा आउन लागेको ‘१२ गाउँ २’ले अन्य दुई चर्चित चलचित्रसँग प्रतिस्पर्धा गर्नुपर्नेछ । यस्तो अवस्थामा ट्रेलर सार्वजनिक भएपछि आएका नकारात्मक प्रतिक्रियाले चलचित्रको व्यापारमा कस्तो प्रभाव पार्छ भन्ने कुरा भने प्रदर्शनपछि मात्रै स्पष्ट हुनेछ ।