गत वर्ष सार्वजनिक प्रदर्शन भई सुपर हिट भएको नेपाली चलचित्र ‘दयारानी’ नेपालको अग्रणी ओटीटी प्लेटफर्म ‘सिनेमाघर’मा रिलिज भएको छ । ‘दयारानी’ नेपाली पारिवारिक चलचित्र हो, जसलाई माओत्से गुरुङले लेखन तथा निर्देशन गरेका छन् । यो चलचित्रमा दयाहाङ राई, दिया पुन, र विजय बराल मुख्य भूमिकामा छन् ।

बाँसुरी फिल्मस् र माओत्से फिल्मस्को ब्यानरमा निर्माण भएको यस चलचित्रको कथाले एक दम्पतीको बाँझोपनसँगको सङ्घर्षलाई मार्मिक रूपमा प्रस्तुत गर्दछ । समाजका अपेक्षाहरू र जटिल पारिवारिक सम्बन्धहरूको बीचमा, पतिपत्नीले सन्तान प्राप्तिका लागि गर्ने प्रयासहरूलाई चलचित्रले हास्य र भावनात्मक ढङ्गले चित्रण गरेको छ ।

‘सिनेमाघर’ नेपाली चलचित्रहरूको डिजिटल प्रदर्शनका लागि चर्चित ओटीटी प्लेटफर्म हो, जसले दर्शकहरूलाई सजिलै नेपाली चलचित्रहरू हेर्न सक्ने सुविधा प्रदान गर्छ । सिनेमाघरको एप एन्ड्रोइड र आइओएस मोबाइलहरू, स्मार्ट टिभीमा उपलब्ध छ भने ल्यापटप तथा डेस्कटपमा वेब ब्राउजरमार्फत प्रयोग गर्न सकिन्छ ।

यस ओटीटी प्लेटफर्ममा चलचित्र हेर्न चाहने दर्शकले संसारभरबाट मास्टर कार्ड तथा भिसा कार्ड प्रयोग गरी एवम् नेपाल तथा भारतबाट सरल रूपमा विभिन्न डिजिटल वालेटहरू तथा क्युआर कोड भुक्तानी गर्न सक्नेछन् । साथै, नेपाली भाषामा सपोर्ट तथा २४ घण्टाको प्राविधिक सहायता सुविधा समेत उपलब्ध छ, जसले दर्शकलाई अझ सहज बनाउनेछ ।