नेपाली चलचित्र क्षेत्रको नियामक तथा प्रवर्द्धनकारी निकाय चलचित्र विकास बोर्डमा नयाँ कार्यवाहक अध्यक्षको जिम्मेवारी तोकिएको छ। सञ्चार तथा सूचना प्रविधि मन्त्रालयका सहसचिव रविलाल शर्मालाई बोर्डको कार्यवाहक अध्यक्षको जिम्मेवारी दिइएको हो।

बोर्डका तत्कालीन अध्यक्ष दिनेशराज दाहाल ‘दिनेश डिसी’ले आफ्नो दुई वर्षे कार्यकाल पूरा गरी गत भदौ ११ गते पदबाट बिदा लिएपछि अध्यक्ष पद रिक्त थियो। अध्यक्ष पद रिक्त भएपछि बोर्डका दैनिक प्रशासनिक काम तथा अत्यावश्यक निर्णय प्रभावित नहोऊन् भन्ने उद्देश्यले मन्त्रालयले शर्मालाई कार्यवाहक अध्यक्षको जिम्मेवारी दिएको हो।

शर्माले बुधबार नै चलचित्र विकास बोर्डको कार्यवाहक अध्यक्षका रूपमा पदभार ग्रहण गरेका छन्। नयाँ अध्यक्ष नियुक्त नभएसम्म उनले बोर्डको नेतृत्व सम्हाल्नेछन्।

कार्यवाहक अध्यक्षको जिम्मेवारी पाएसँगै शर्मासामु नेपाली चलचित्र क्षेत्रसँग सम्बन्धित विभिन्न कामलाई निरन्तरता दिने जिम्मेवारी आएको छ। चलचित्र क्षेत्रको विकास, प्रवर्द्धन, फिल्मसम्बन्धी नीतिगत तथा प्रशासनिक काम र बोर्डका नियमित गतिविधिलाई प्रभावकारी रूपमा अघि बढाउने चुनौती उनीसामु रहनेछ।

यसैबीच, पछिल्लो समय प्राकृतिक विपद्का कारण प्रभावित बनेको चलचित्र क्षेत्रलाई चलायमान बनाउन चलचित्र विकास बोर्डले विभिन्न गतिविधि अघि बढाइरहेको छ। बाढीपहिरो प्रभावितका लागि च्यारिटी शो आयोजना गर्ने तयारीसमेत बोर्डले गरिरहेको छ।

अब नयाँ अध्यक्ष नियुक्त नभएसम्म कार्यवाहक अध्यक्ष रविलाल शर्माको नेतृत्वमा बोर्डका नियमित काम अघि बढ्नेछन्।