logo

२०८३ मंसिर ७ आइतबार

‘हिमालयन गोल्ड’मार्फत नेपाली सिनेमामा फरक विषय प्रस्तुत

‘हिमालयन गोल्ड’मार्फत नेपाली सिनेमामा फरक विषय प्रस्तुत

  • kollywood_khabar
  • बिहिबार, २७ कार्तिक २०८३
117
SHARES
‘हिमालयन गोल्ड’मार्फत नेपाली सिनेमामा फरक विषय प्रस्तुत

निर्देशकका रूपमा डेब्यू गर्न लागेका धिरज राजवंशीले आफ्नो पहिलो फिल्म ‘हिमालयन गोल्ड’मार्फत नेपाली सिनेमामा फरक विषय प्रस्तुत गर्ने प्रयास गरेका छन् । आगामी मंसिर ४ गतेदेखि प्रदर्शनमा आउने यस फिल्मको कथा यार्सागुम्बा संकलनका क्रममा हिमाली क्षेत्रमा हुने लुटपाट, संघर्ष र प्रतिशोधमा आधारित छ ।

अमेरिकाको लसएन्जल्समा फिल्म निर्देशन तथा निर्माणसम्बन्धी अध्ययन गरेका धिरज नेपाल फर्किएपछि नयाँ र अन्तर्राष्ट्रिय दर्शकसम्म पुग्न सक्ने नेपाली कथा खोजिरहेका थिए । यही क्रममा उनी फिल्म ‘खुस्मा’को सुटिङका लागि रुकुम पुगे । त्यहाँको बसाइ नै ‘हिमालयन गोल्ड’ निर्माणको आधार बन्यो ।

रुकुममा रहँदा उनले स्थानीयसँगको कुराकानीबाट यार्सागुम्बा संकलनसँग जोडिएका अनेक घटना र संघर्षबारे जानकारी पाए । विशेषगरी यार्सागुम्बा टिप्न जाने मानिसमाथि हुने लुटपाट र सुरक्षाको अभावले उनलाई यस विषयमा फिल्म बनाउन प्रेरित गर्‍यो ।

निर्देशक राजवंशीका अनुसार सन् १९९० को दशकतिर यार्सागुम्बा संकलनका लागि रुकुम, डोल्पा, रोल्पा र मनाङका मानिसहरू विभिन्न हिमाली क्षेत्रमा पुग्थे । तर, सरकारी सुरक्षाको उचित व्यवस्था नहुँदा उनीहरू लुटेराहरूको निशानामा पर्ने गरेका थिए । फिल्मले त्यही समयको सामाजिक परिवेश र स्थानीय समुदायको संघर्षलाई पर्दामा उतारेको छ ।

कथा तयार पार्न उनलाई एक वर्षभन्दा बढी समय लाग्यो । सुटिङअघि उनी चार पटकसम्म मुस्ताङ पुगेका थिए । सुरुमा डोल्पामा छायांकन गर्ने योजना भए पनि भौगोलिक कठिनाइ, यातायातको असुविधा र उत्पादन खर्चका कारण लोकेसन परिवर्तन गरिएको थियो । फिल्मको अधिकांश छायांकन ४ हजार ८ सय मिटरभन्दा माथिको उचाइमा गरिएको निर्देशकको भनाइ छ । लोमान्थाङ र त्यसभन्दा माथिका क्षेत्रमा व्यावसायिक रूपमा छायांकन गरिएको फिल्ममध्ये यो पहिलो हुन सक्ने उनको दाबी छ ।

फिल्ममा परीक्षा लिम्बु मुख्य भूमिकामा छिन् । ‘ऊनको स्वीटर’मा उनको अभिनय देखेपछि धिरजले उनलाई मुख्य पात्रका रूपमा छनोट गरेका थिए । फिल्ममा परीक्षाको चरित्रले परिवारमाथि आइपरेको संकटसँग जुध्दै प्रतिशोधको बाटो रोज्छ । यार्सागुम्बा लुट्दै आएका चार जना लुटेराको जालमा उनको परिवारसमेत परेपछि कथाले नयाँ मोड लिन्छ ।

लुटेरा समूहका सदस्यका रूपमा कर्मा शाक्य र सजन थापा मगर देखिँदैछन् भने सुनिल थापा पनि महत्वपूर्ण भूमिकामा छन् । निर्देशकले स्क्रिप्ट लेख्दादेखि नै कर्मालाई एउटा पात्रका रूपमा परिकल्पना गरेका थिए । त्यस्तै, ‘पशुपति प्रसाद’ हेरेपछि सजनलाई आफ्नो फिल्ममा लिने इच्छा बनाएको उनले बताएका छन् ।

हिमाली क्षेत्रमा छायांकन गर्नु निर्माण टोलीका लागि सहज थिएन । अत्यधिक चिसो र उच्च उचाइका कारण कलाकार तथा प्राविधिकको स्वास्थ्यमा विशेष ध्यान दिनुपरेको थियो । छायांकन अवधिभर प्रोडक्सन म्यानेजरले दैनिक रूपमा टोलीका सदस्यको अक्सिजन लेभल जाँच गर्ने व्यवस्था मिलाएका थिए ।

धिरज ‘हिमालयन गोल्ड’लाई व्यावसायिक फिल्मकै रूपमा लिन्छन् । तर, यसको कथावाचन र विधा नेपाली सिनेमामा प्रचलित शैलीभन्दा फरक रहेको उनको दाबी छ । उनका अनुसार नेपाली फिल्ममा एउटै खालका विषय दोहोरिँदै आएका बेला यार्सागुम्बा र त्यससँग जोडिएको संघर्षलाई नयाँ ढंगले प्रस्तुत गर्नु चुनौतीपूर्ण काम थियो ।

फिल्मको छायांकनका क्रममा मुस्ताङको विकट क्षेत्र टकमारमा समेत तीन दिन बिताएको निर्देशकले बताएका छन् । त्यहाँको प्राकृतिक सुन्दरता र स्थानीयको जीवनशैलीले आफूलाई प्रभावित बनाएको भन्दै उनले उक्त क्षेत्रको पर्यटन प्रवर्द्धनमा पनि ध्यान दिनुपर्ने धारणा राखेका छन् ।

अ ह्वाइट एलिफेन्ट मोसन पिक्चरको ब्यानरमा बनेको फिल्ममा सुनिल थापा, कर्मा शाक्य, मेनुका प्रधान, परीक्षा लिम्बु, राहुल एन. मुखिया, सजन थापा मगर, अङ्कित खड्कालगायत कलाकारको अभिनय छ । मीनबहादुर भाम निर्माता रहेको फिल्ममा धिरज राजवंशीकै कथा तथा दीपेन्द्र गौचन र धिरज राजवंशीको पटकथा छ ।

विशेष कुरा, यो दिग्गज अभिनेता सुनिल थापाले अभिनय गरेको अन्तिम फिल्मसमेत हो । हिमाली परिवेशमा निर्माण गरिएको यस सर्भाइभल थ्रिलरलाई भारतमा प्रतिष्ठित वितरण कम्पनी ए ए फिल्म्सले प्रदर्शन गर्नेछ भने नेपालमा एप्पल इन्टरटेनमेन्टले वितरण गर्ने जिम्मेवारी लिएको छ ।


बिहिबार, २७ कार्तिक २०८३
सम्बन्धित समाचार
Go