दिपक दिपाको नया फिल्म ‘छक्का पञ्जा ५’ प्रदर्शन मिति जति नजिक आउदैछ त्यति नै फिल्मले चर्चा पाइरहेको छ । फिल्म प्रदर्शनका लागि करीव अझै डेढ महिना बाँकी रहँदा पहिलो गीत सार्वजनिक गरेको छ ।सार्वजनिक भएको ‘बिहे भाको छैन’ बोलको गीतमा सविन सुवेदी र बेनिशा पौडेलको स्वर छ भने दीपकराज गिरी र दीपक शर्माको शब्द तथा दीपक शर्मा स्वयंको संगीत छ । सुनिल क्षेत्रीको कोरियोग्राफीमा बनेको गीतमा फिल्मका शीर्ष अभिनेता दीपकराज गिरी र अभिनेत्री वर्षा सिवाकोटी चित्रित छन् । गीतले उनीहरुबीचको प्रेमलाई दर्शाउँछ । कहिले यो जोडी दुलहा(दुलही बनेर देखिएका छन् भने कहिले क्लबमा नाच्दै प्रस्तुत छन् । अन्तिममा फिल्मका शीर्ष कलाकार केदार घिमिरे (माग्ने बुढा) पनि देखिन्छन् ।
दीपाश्री निरौलाको निर्देशनमा तयार भएको फिल्ममा हरि हुमागाइँको डिओपी तथा उत्तम हुमागाइँको छायांकन रहेको फिल्ममा दीपकराज स्वयंको पटकथा लेखन छ भने कथा र संवादमा उनलाई केदार घिमिरे र दीलिप तामाङले सघाएका छन् । फिल्ममा रोशन श्रेष्ठको द्वन्द्व निर्देशन तथा विपिन मल्लको सम्पादन छ ।
फिल्म दशैंको असोज २४ गते देखि प्रदर्शनमा आउँदैछ ।