वरिष्ठ गायिका तथा संगीतकार मिरा राणाले क्यान्सर पीडितको सहयोगका लागि विशेष एकल सांगीतिक साँझ आयोजना गर्ने भएकी छन् । आगामी असोज ४ गते काठमाडौंको कमलादीस्थित नेपाल प्रज्ञा प्रतिष्ठानमा उनको एकल सांगीतिक कार्यक्रम हुँदैछ ।

७५ वर्षीया राणाले आफ्नो जीवनकै अन्तिम सांगीतिक कार्यक्रमका रूपमा यसलाई प्रस्तुत गर्न लागेको बताएकी छन् । आफू स्वयं क्यान्सरलाई परास्त गर्न सफल भए पनि यही रोगका कारण पति उदयजंग राणालाई गुमाएकी उनले क्यान्सर पीडितको सहयोगका लागि ‘मिरा राणा क्यान्सर समाज’ स्थापना गरेकी छन् ।

कार्यक्रमबाट संकलन हुने रकम समाजको कोषमा जम्मा गरी क्यान्सरबाट प्रभावित तथा उपचाररत बिरामीलाई सहयोग गर्ने उद्देश्य राखिएको छ । संगीतमार्फत मनोरञ्जनसँगै सामाजिक सेवाको सन्देश दिने कार्यक्रमका रूपमा एकल सांगीतिक साँझ आयोजना गर्न लागिएको हो ।

कार्यक्रममा मिरा राणाले गाएका तथा संगीत भरेका करिब दुई दर्जन गीत विभिन्न चर्चित गायक–गायिकाले आफ्नै शैलीमा प्रस्तुत गर्नेछन् । शम्भुजित बासकोटा, रामभक्त जोजिजु, कपिल लोहनी, कृष्णगोपाल श्रेष्ठ, योगेन्द्र उपाध्याय, छिरिङ भुटिया लगायतका कलाकारको प्रस्तुति रहनेछ ।

त्यस्तै, क्यान्सरलाई जितेका गायिका तारा थापा र संगीता थापा शाक्यसहित निशा देशार, रुपी सिंह, माण्डवी त्रिपाठी, सविना कार्की, इतु जोजिजु, शितल थापा र युनिशा देशारले पनि राणाका गीत गाउनेछन् ।

राणा स्वयंले पनि कार्यक्रममा आफ्ना चर्चित गीत प्रस्तुत गर्नेछिन् । स्वरसम्राट नारायण गोपालसँग गाएको ‘तिमी देऊ या नदेऊ’, ‘मेरो जोवन लैजाऊ’, ‘आँखैमा कसैको तस्बिर बसेछ’ र ‘बैनीको दया छ’ लगायतका गीत कार्यक्रममा प्रस्तुत हुने बताइएको छ ।

कार्यक्रमको संगीत संयोजन तथा सञ्चालनको जिम्मेवारी मनोहर सुनामले सम्हाल्नेछन् । लामो सांगीतिक यात्रापछि राणाले गर्न लागेको यो विशेष कार्यक्रमले संगीतप्रेमीसँगै क्यान्सर पीडितका लागि सहयोग जुटाउने अपेक्षा गरिएको छ ।