नेपाली फिल्म ‘झिँगेदाउ २’ प्रदर्शनको संघारमा पुगेका बेला फिल्ममा समावेश तीज गीतले सामाजिक सञ्जालमा तहल्का मच्चाएको छ । केकी अधिकारी र आँचल शर्मालाई जेठानी–देउरानीको भूमिकामा प्रस्तुत गरिएको ‘जेठानी भर्सेस देउरानी’ बोलको तीज ब्याटल गीत सार्वजनिक भएपछि युट्युब, फेसबुक रिल्सदेखि टिकटकसम्म चर्चामा छ ।

ओएसआर डिजिटलबाट सार्वजनिक गरिएको गीतले छोटो समयमै ठूलो दर्शकको ध्यान खिचेको छ । युट्युबमा मात्रै गीतले ५० लाखभन्दा बढी भ्युजको आँकडा पार गरेको विवरण सार्वजनिक भएका छन् । सामाजिक सञ्जालका विभिन्न प्लेटफर्ममा समेत गीतका छोटा भिडियो, रिल्स र टिकटक सामग्री व्यापक रूपमा फैलिरहेका छन् । यसले गीतलाई फिल्मको प्रमुख प्रचार सामग्रीका रूपमा स्थापित गरेको देखिन्छ।

करिब सात मिनेट लामो गीतमा केकी अधिकारी र आँचल शर्माबीचको जेठानी–देउरानीको घम्साघम्सीलाई मनोरञ्जनात्मक ढंगले प्रस्तुत गरिएको छ । गीतमा एलीना चौहान र रचना रिमालको स्वर रहेको छ भने बाबुल गिरीले शब्द, संगीत, संयोजन तथा मिक्सिङ–मास्टरिङ गरेका छन् । भिडियोको कोरियोग्राफी रामजी लामिछानेले गरेका हुन्।

ज्ञानेन्द्र देउजाको निर्देशनमा बनेको ‘झिँगेदाउ २’मा केकी अधिकारी र आँचल शर्मासँगै महेश त्रिपाठी, कुशल विष्ट, आर्यन सिग्देल, हिउँवाला गौतम, सरोज खनाल, बसुन्धरा भुसाललगायत कलाकारको अभिनय छ । फिल्मको पटकथा तथा संवाद परिच्छेद सेनले लेखेका छन् भने गोविन्दु फुयाँल र शिशिर चालिसे लेखकका रूपमा छन्।

सुलभ प्रतिक देउजा र समिक्षा देउजा निर्माता रहेको फिल्ममा रोशनी अधिकारी देउजा र नीतु श्रेष्ठ देउजा सहनिर्माताका रूपमा छन् । विष्णु घिमिरे ‘कल्पित’को छायांकन, मित्र डी गुरुङको सम्पादन, अर्जुन पोखरेलको संगीत तथा रोशन श्रेष्ठको एक्सन निर्देशन रहेको छ।

‘झिँगेदाउ २’ असोज २ गते अर्थात् सेप्टेम्बर १८ देखि हलमा प्रदर्शन हुँदैछ । विभिन्न चलचित्र हलका आधिकारिक सूचीमा समेत फिल्मलाई सोही मितिको प्रदर्शनका रूपमा राखिएको छ।

गीतको व्यापक चर्चाले फिल्मको प्रचारलाई थप बल दिएको छ । यद्यपि गीतको भ्युज मात्रका आधारमा फिल्मको वास्तविक व्यावसायिक सफलता निर्धारण गर्न सकिँदैन । अब फिल्म हलमा दर्शकको प्रतिक्रिया र प्रदर्शनबाट कस्तो परिणाम निकाल्छ भन्ने चासोको विषय बनेको छ।