मनोवैज्ञानिक कथामा आधारित नेपाली चलचित्र ‘कमला मिस’ ले प्रदर्शनअघि नयाँ प्रेमगीत ‘तिमी मेरो संजीवनी’ सार्वजनिक गरेको छ। वरिष्ठ कलाकार तथा निर्देशक निर शाह निर्देशित यस चलचित्र साहित्यकार तथा नाटककार विजय मल्लको चर्चित नाटक *‘कोही किन बर्बाद होस्’*बाट प्रेरित भएर निर्माण गरिएको हो।

सार्वजनिक गीतमा युग भुसालको शब्द तथा संगीत रहेको छ। गीतमा रुबाई र सरोदी कुमारले स्वर दिएका छन् भने मिक्सिङ तथा मास्टरिङ रूप महन्तले गरेका हुन्। मुम्बईको प्लेहेड स्टुडियोमा रेकर्ड गरिएको गीतको कोरियोग्राफी रामजी लामिछानेले सम्हालेका छन्।

आगामी **साउन २२ गते (अगस्ट ७)**देखि प्रदर्शनमा आउने तयारीमा रहेको चलचित्रले मानवीय मनोविज्ञानलाई केन्द्रमा राखेर कथा प्रस्तुत गर्ने बताइएको छ।

चलचित्रमा निर शाह, रमेश बुढाथोकी, वासना तिमिल्सिना, शिवं सराफ क्षेत्री, आरभ दाहाल, भावना मगर, कृष्ण मुरारी ढुंगेल, सुशान्त कुमार श्रेष्ठ, जयन्त रेग्मी, सुरेश थापा, राजन केसी र सञ्जय खतिवडालगायत कलाकारहरूको अभिनय रहेको छ।

विजय मल्ल स्मृति प्रतिष्ठानका लागि विजय मल्ल परिवारले निर्माण गरेको चलचित्रका कार्यकारी निर्मातामा चैतन्य प्रकाश प्रधान, उमेश मल्ल, रमेशबाबु श्रेष्ठ र राम भट्टराई रहेका छन्। पुष्कर लामा (प्रेम भोम्जन) ले लाइन प्रोड्युसरको जिम्मेवारी सम्हालेका छन्।

चलचित्रको कथा विजय मल्लको हो भने पटकथा तथा संवाद निर शाह, प्रजल दुलाल र सुगम दुलालले संयुक्त रूपमा लेखेका हुन्। प्राविधिक पक्षमा शिवराम श्रेष्ठको छायांकन, मिलन विक्रम शाहको सम्पादन, किरण तुलाधरको पार्श्व संगीत, मुकेश शाहको साउन्ड मास्टरिङ, रेनिश फागोको रङ संयोजन तथा रामजी लामिछानेको कोरियोग्राफी रहेको छ। चलचित्रलाई एप्पल इन्टरटेन्मेन्ट, रिच इन्टरटेन्मेन्ट र एफडी कम्पनीले देशभर वितरण गर्नेछन्।