शुक्रबारदेखि देशभर प्रदर्शनमा आएको नेपाली चलचित्र ‘बेहुली’ले दोस्रो दिन शनिबार पनि दर्शकको उत्साहजनक साथ पाएको छ । पहिलो दिनदेखि नै सुखद सुरुवात गरेको चलचित्रले शनिबार भने अझै उच्च दर्शक चाप देखाएको निर्माण पक्षले जनाएको छ ।

करिब १०० शोबाट प्रदर्शन थालेको चलचित्रमा दर्शकको माग बढ्दै गएपछि मल्टिप्लेक्ससँगै एकल पर्दामा समेत शो सङ्ख्या थपिएको छ । चलचित्रप्रति दर्शकको चासो बढेसँगै हल सञ्चालकहरूले उपलब्ध शो थप गर्दै प्रदर्शनलाई विस्तार गरेका हुन् ।

चलचित्रको प्रचारप्रसारका लागि मुख्य कलाकारहरू पारस बम ठकुरी, दिव्या रायमाझी, सुशान्त कार्की, पदम तामाङ र सन्तोष बानियाँलगायतको टोली काठमाडौंका विभिन्न हलमा पुगिरहेको छ । कलाकारहरूले दर्शकसँग प्रत्यक्ष साक्षात्कार गर्दै चलचित्रको प्रतिक्रिया लिइरहेका छन् । निर्माण पक्षका अनुसार दर्शकबाट चलचित्रले सकारात्मक प्रतिक्रिया पाइरहेको छ ।

चलचित्रका प्रस्तुतकर्ता अर्जुन पोखरेलले दर्शकको रुचिलाई ध्यानमा राखेर स्तरीय कथावस्तुमा चलचित्र निर्माण गरिएकाले ‘बेहुली’लाई दर्शकले मन पराएको बताएका छन् । उनका अनुसार चलचित्रले दर्शकको भावनासँग जोडिन सफल भएको छ ।

यता वितरक गोविन्द शाहीले पहिलो दिनदेखि नै चलचित्रको व्यापार उत्साहजनक रहेको र शनिबार बिदाको दिन भएकाले हलमा दर्शकको चाप झनै बढेको बताए । उनका अनुसार दर्शकको मागलाई सम्बोधन गर्न प्रदर्शनकै क्रममा थप शो उपलब्ध गराइएको हो ।

‘बेहुली’ले नेपाली समाजभित्रका यथार्थ भावना, युवा पुस्ताको मनोविज्ञान तथा पारिवारिक सम्बन्धका संवेदनशील पक्षलाई कथामार्फत प्रस्तुत गरेको छ । चलचित्रको लेखन माधव शर्माले गरेका हुन् भने निर्देशन शशान कँडेलले गरेका छन् ।

चलचित्रका प्रस्तुतकर्ता अर्जुन पोखरेल र निर्माता प्रताप शमशेर राणा हुन् । कार्यकारी निर्मातामा शङ्कर कोइराला र रमेश सिलवाल रहेका छन् । दुर्गा खरेल र शिशिर श्रेष्ठ सह–निर्माता हुन् ।