चलचित्र ‘सिन्दुरे जात्रा’ को सम्पूर्ण छायांकन सम्पन्न भएको छ । पर्वतको प्राकृतिक सौन्दर्य बोकेको आर्थर डाँडाखर्कबाट सुरु गरिएको सुटिङ यात्रा मंगलबार अन्तिम चरणमा पुगेर टुंगिएको निर्माण टिमले जनाएको छ ।

जेठ १ गतेदेखि सुरु भएको छायांकन प्रारम्भिक चरणमै चुनौतीपूर्ण बनेको थियो । करिब १५ दिनको सुटिङपछि मुख्य अभिनेता विजय बराल घाइते भएपछि निर्माण कार्य रोक्नुपरेको थियो । उनको दाहिने हातको नाडीमा चोट लागेका कारण केही समय विश्राम गर्नुपरेको थियो । स्वास्थ्यमा सुधार आएपछि दोस्रो चरणको छायांकन पुनः सुरु गरिएको थियो ।

निर्देशक सरोज पौडेलका अनुसार चलचित्रको सम्पूर्ण छायांकन पूरा गर्न करिब ४० दिन लागेको हो । उनले कलाकार र प्राविधिक टोलीको समर्पण र मेहनतप्रति आभार व्यक्त गर्दै दर्शकले मंसिर ४ गते गुणस्तरीय चलचित्र हेर्न पाउने विश्वास व्यक्त गरेका छन् ।

‘सिन्दुरे जात्रा’मा सरोज पौडेल, विजय बराल र अञ्जना बराइलीको दोस्रो सहकार्य हो । यसअघि उनीहरूले चर्चित चलचित्र ‘पूर्णबहादुरको सारङ्गी’ मा सँगै काम गरेका थिए ।

अभिनेता विजय बरालले पनि चोटकै अवस्थाबीच छायांकन पूरा गर्नु चुनौतीपूर्ण भए पनि फिल्मको कथा र आफ्नो पात्रप्रति आफू अत्यन्त उत्साहित रहेको बताएका छन् ।

सारङ्गी फिल्म्सको ब्यानरमा निर्माण भइरहेको चलचित्रमा विजय र अञ्जनासहित विनोद न्यौपाने, रामप्रसाद खनाल, कमलमणि नेपाल, लोकेन्द्र लेखक, भोलाराज सापकोटा, उषा खड्गी, हिउँवाला गौतम, राकेश खड्का र रजनी गुरुङलगायत कलाकारहरूको अभिनय रहनेछ ।

चलचित्रको कथा निर्देशक सरोज पौडेल स्वयंले तयार गरेका हुन् भने सबिन अधिकारी र वसन्त न्यौपानेले पटकथा तथा संवाद लेखेका छन् ।

दिनेश खड्का कार्यकारी निर्माता रहेको फिल्ममा आकाश, सुमन रञ्जित र श्याम मगर सह–निर्माताका रूपमा रहेका छन् । पदम बहादुर श्रेष्ठ (बाबु) डीओपी रहेको चलचित्रमा नहकुल खड्काको सम्पादन तथा प्रशान्त सिवाकोटी, रिदम कँडेल र नन्दु परियारको संगीत रहनेछ ।

देशव्यापी वितरण आरआर फिल्म्सले गर्ने यस चलचित्र ‘सिन्दुरे जात्रा’ आगामी मंसिर ४ गते प्रदर्शनमा आउने तयारीमा रहेको छ ।