फिल्म ‘महाराजधिराज’ को छायांकनका क्रममा खिचिएको चार मिनेटको भिडिओ टिकटकमा सार्वजनिक गरेको आरोपमा निर्माण टिमले स्पटब्वायविरुद्ध कानुनी प्रक्रिया अघि बढाएको छ । निर्माण पक्षले ५१ लाख रुपैयाँ क्षतिपूर्ति माग गर्दै मुद्दा दायर गरेको हो ।

निर्माण टिमका अनुसार मोबाइलबाट छायांकनको भिडिओ खिचेर टिकटकमा अपलोड गरिएपछि फिल्मको कथावस्तु र गोपनीयता भंग भएको छ । उक्त घटनाका कारण ६ दिनको छायांकन खेर गएको र पुनः छायांकन गर्नुपर्दा ५१ लाख रुपैयाँ बराबरको आर्थिक क्षति पुगेको दाबी गरिएको छ । सोही रकम स्पटब्वायबाट असुल गर्न माग गरिएको छ ।

निर्माण टिमका तर्फबाट नेत्रबहादुर विष्टले साउन ५ गते जिल्ला प्रहरी कार्यालय काठमाडौंमा स्पटब्वाय सुदीप भनेर चिनिने २७ वर्षीय मनोज अधिकारीविरुद्ध किटानी जाहेरी दिएका थिए । त्यसपछि प्रहरीले अधिकारीलाई पक्राउ गरेको थियो ।

अनुसन्धानका क्रममा अधिकारीले एक मिनेट २० सेकेन्डका तीन वटा क्लिप जोडेर टिकटकमा अपलोड गरेको स्वीकार गरेका छन् । उनले निर्माण टिमको आग्रहपछि भिडिओ करिब १० मिनेटभित्रै हटाएको पनि बताएका छन् । हाल टिकटकमा उक्त भिडिओ उपलब्ध छैन ।

प्रहरीले निर्माण टिमको जाहेरीका आधारमा जिल्ला सरकारी वकिलको कार्यालयमार्फत साउन ६ गते जिल्ला अदालत काठमाडौंमा मुद्दा दायर गरेको थियो । साउन ७ गते न्यायाधीश मावधप्रसाद सुवेदीको इजलासमा सुनुवाइ भएपछि अदालतको आदेशअनुसार अधिकारी सोही दिन रिहा भएका थिए ।

अधिकारीविरुद्ध विद्युतीय कारोबार ऐन, २०८३ को दफा ४८ उपदफा (१) अन्तर्गत गोपनीयता भंगको कसुरमा सजाय माग गरिएको छ । उक्त मुद्दा हाल जिल्ला अदालत काठमाडौंमा विचाराधीन रहेको छ ।