लोकगायक खेम सेन्चुरीको नयाँ गीत ‘बाहुन बाजे किन कसेको’लाई लिएर उत्पन्न विवाद सहमतिमा टुंगिएको छ । गीतलाई लिएर परेको उजुरीमाथि साइबर ब्यूरोमा दुई दिनसम्म चलेको छलफलपछि उजुरीकर्ता र सेन्चुरीबीच लिखित सहमति भएको हो ।

सहमति अनुसार गीतमा विवादित बनेका शब्द हटाइनेछ । साथै, पूजा गर्ने क्रममा ब्राह्मणले खाएको दृश्यलाई ब्लर गर्ने र गीतको शीर्षकसमेत परिवर्तन गर्ने सहमति भएको छ ।

दुवै पक्षले सहमतिपत्रमा हस्ताक्षर गरेका छन् । ब्राह्मण समुदायलाई होच्याउने तथा मानमर्दन गर्ने खालको सामग्री गीतमा रहेको दाबी गर्दै त्यसलाई तत्काल बन्द गर्नुपर्ने मागसहित साइबर ब्यूरोमा उजुरी परेको थियो ।

उजुरी परेपछि प्रहरीले मंगलबार दुवै पक्षलाई छलफलका लागि बोलाएको थियो । मंगलबारको वार्ताबाट निष्कर्ष ननिस्किएपछि बुधबार पुनः छलफल गरिएको थियो । दोस्रो दिनको वार्तापछि भने गीतमा आवश्यक परिमार्जन गर्ने विषयमा दुवै पक्षबीच सहमति जुटेको हो ।