यही शुक्रबार अर्थात् असोज २३ गतेदेखि प्रदर्शनमा आउन लागेको फिल्म ‘अक्षरा’को नयाँ गीत ‘भाग्यले हो कि’ सार्वजनिक गरिएको छ । वियोगान्त भाव बोकेको गीतमा रचना रिमालको स्वर, सुरेन्द्र रानाको शब्द तथा कर्णराज गिरीको संगीत रहेको छ ।

गीतले जीवनप्रति निराश बनेकी एक महिलाको भावनात्मक अवस्थालाई चित्रण गरेको छ । रामजी लामिछानेको कोरियोग्राफी रहेको भिडियोमा अभिनेत्री न्यान्सी खड्काको वैवाहिक जीवनमा देखिएका उतारचढावलाई प्रस्तुत गरिएको छ ।

विवाहपछि पनि सिन्दूर र चुरा लगाउन नपाउँदाको पीडा तथा त्यसले निम्त्याएको भावनात्मक संघर्ष न्यान्सीको पात्रमार्फत देखाइएको छ । भिडियोमा सुशील सिटौला र रिस्ता बस्नेतलाई समेत देख्न सकिन्छ ।

क्षित बाबु प्रोडक्सन हाउसको ब्यानरमा निर्माण भएको फिल्मलाई विनयराज पौडेलले निर्देशन गरेका हुन् । फिल्ममा सुशील पोखरेल, उत्तम केसी, अंशु महर्जन, पुष्कर राउत, गीता अधिकारी, वीरेन्द्र कुशवाह, सृजना अधिकारी, मोहन अधिकारी, सुमन ज्योति न्यौपाने, सृष्टि खड्का र प्रीसा ढुङ्गानालगायत कलाकारको अभिनय छ ।

सोनी थापा (ढुङ्गाना) प्रस्तुतकर्ता रहेको फिल्ममा उग्रसेन ढुङ्गाना र सुग्रसेन ढुङ्गाना निर्माता तथा सुरज थापाकाजी र सुमन ज्योति न्यौपाने कार्यकारी निर्माता छन् ।

फिल्मको कथा उग्रसेन ढुङ्गानाको हो भने पटकथा तथा संवाद अभिमन्यु निरवी र विनयराज पौडेलले तयार पारेका हुन् । कर्णराज गिरीको संगीत, दिपेन बस्न्यातको छायांकन र गौतमराज खड्काको सम्पादन रहेको फिल्म असोज २३ गतेबाट प्रदर्शनमा आउनेछ ।