दर्शकलाई विश्वस्तरीय सिनेमा अनुभव प्रदान गर्ने उद्देश्यसहित काठमाडौंको कमलपोखरीस्थित सिटी सेन्टरमा रहेको बिग मुभिजले आफ्नो हललाई अत्याधुनिक प्रविधि र सुविधासहित पुनःसज्जित गरेको छ । नेपालमा आधुनिक मल्टिप्लेक्स संस्कृतिको सुरुवात गर्ने पहिलो मल्टिप्लेक्सका रूपमा परिचित बिग मुभिजले करिब दुई दशकपछि आफ्नो पूर्वाधार र प्रविधिमा व्यापक सुधार गरेको हो ।

‘एक्सपिरियन्स सिनेमा, एक्सपिरियन्स द डिफिरेन्स’ नारालाई आत्मसात् गर्दै हलको दृश्य प्रविधि, ध्वनि प्रणाली, सिटिङ व्यवस्था र आन्तरिक सजावटमा विशेष ध्यान दिइएको कम्पनीले जनाएको छ ।

नयाँ व्यवस्थाअन्तर्गत बिग मुभिजमा युरोपेली ब्रान्ड बारकोको अत्याधुनिक ४के आरजीबी लेजर प्रोजेक्टर जडान गरिएको छ । बारको एसपी४के–२०सी (सिरिज ४) स्मार्ट लेजर प्रोजेक्टरमा २१ हजार ल्युमेन्स ब्राइटनेस र ४के (४०९६x२१६०) नेटिभ रिजोलुसन क्षमता रहेको छ । यसले पर्दामा चलचित्रका दृश्यलाई थप चम्किलो, स्पष्ट र जीवन्त बनाउने अपेक्षा गरिएको छ ।

रङको गुणस्तरलाई समेत प्राथमिकता दिँदै ९८.५ प्रतिशतभन्दा बढी रेस २०२० तथा डीसीआई–पी३ कलर स्पेस सपोर्ट गर्ने प्रविधि प्रयोग गरिएको छ । विभिन्न आकारका विशेष सिल्भर स्क्रिनले दृश्यको गुणस्तरलाई थप प्रभावकारी बनाउने कम्पनीको दाबी छ ।

ध्वनि प्रणालीमा पनि उल्लेखनीय परिवर्तन गरिएको छ । बिग मुभिजले ६४ च्यानल क्षमताको डल्बी एटमस थ्रीडी इमर्सिभ साउन्ड सिस्टम जडान गरेको छ । प्रत्येक स्पिकरमा छुट्टाछुट्टै अडियो फिड उपलब्ध हुने यस प्रविधिले हलभित्र चारैतिरबाट ध्वनि आएको अनुभूति गराउनेछ । सीपी–५ए साउन्ड प्रोसेसरको सहायताले एकैपटक १२८ वटासम्म साउन्ड अब्जेक्ट नियन्त्रण गर्न सकिने व्यवस्था गरिएको छ । विशेषगरी एक्सन तथा ध्वनिप्रधान चलचित्र हेर्दा दर्शकले थप वास्तविक अनुभूति लिन सक्नेछन् ।

दर्शकको आरामलाई ध्यानमा राख्दै सिटिङ व्यवस्थामा पनि सुधार गरिएको छ । हलमा २२ इन्चका २५५ वटा ‘च्याम्पियन सिरिज’ थिएटर कुर्सी राखिएका छन् । एर्गोनोमिक डिजाइन, विशेष कपडाको प्रयोग र तीन तहमा लक गर्न मिल्ने सुविधाले लामो समयसम्म चलचित्र हेर्दा सहजता प्रदान गर्ने कम्पनीको विश्वास छ । त्यस्तै, थप विलासी अनुभवका लागि २९ वटा २९ इन्चका ‘रोयल लक्जुरिया’ क्रिम कलर रिक्लाइनर सिट पनि जडान गरिएको छ ।

यसका अतिरिक्त हलभित्र नयाँ कार्पेट, ध्वनि अनुकूलित भित्ते कभरिङ र आधुनिक प्रकाश व्यवस्थापन गरिएको छ ।

बिग मुभिजका अध्यक्ष राजेन्द्र अर्यालले मंगलबार आयोजित पत्रकार सम्मेलनमा रिनोभेसनबारे जानकारी दिँदै प्रविधि र सुविधाका क्षेत्रमा आफ्नो अग्रणी पहिचानलाई निरन्तरता दिन यो परिवर्तन गरिएको बताए ।

‘नेपालको पहिलो मल्टिप्लेक्सको पहिचान बनाएको बिग मुभिजले प्रविधि र सुविधामा सधैँ पहिलो र अगाडि रहने आफ्नो इतिहासलाई यो व्यापक रिनोभेसनमार्फत पुनः प्रमाणित गरेको छ । अब बिग मुभिजमा चलचित्र हेर्नु पर्दामा दृश्य हेर्नु मात्र हुने छैन, यो पूर्ण रूपमा कथा र वातावरणलाई महसुस गर्ने एउटा अविस्मरणीय अनुभव हुने विश्वास हामीले लिएका छौँ,’ उनले भने ।

नयाँ प्रविधि र सुविधासँगै बिग मुभिजले दर्शकलाई उत्कृष्ट दृश्य, गुणस्तरीय ध्वनि, आरामदायी सिट र समग्रमा फरक सिनेमा अनुभव प्रदान गर्ने लक्ष्य राखेको छ ।