चर्चित भारतीय अभिनेता प्रदीपसिंह रावतको ७४ वर्षको उमेरमा निधन भएको छ । लामो समयदेखि रक्त क्यान्सरबाट पीडित रावतको मंगलबार साँझ मुम्बईस्थित कोकिलाबेन अस्पतालमा उपचारका क्रममा निधन भएको हो ।

उनको निधनको जानकारी भारतमा रहेकी अभिनेत्री विपना थापाले सार्वजनिक गरेकी हुन् । रावतको निधनको खबरले भारतीय चलचित्र क्षेत्रसँगै नेपाली चलचित्र क्षेत्रमा पनि शोक छाएको छ । अभिनेत्री थापासहित विभिन्न कलाकारले सामाजिक सञ्जालमार्फत रावतप्रति श्रद्धाञ्जली व्यक्त गरेका छन् ।

रावत भारतीय चलचित्रका चर्चित कलाकारमध्ये एक थिए । हिन्दी, तेलुगु र तमिल भाषाका चलचित्रमा अभिनय गरेका उनले विशेषगरी खलपात्रका भूमिकाबाट दर्शकमाझ छुट्टै पहिचान बनाएका थिए । उनको अभिनय यात्रा चलचित्रसँगै टेलिभिजनसम्म फैलिएको थियो ।

रावतले चर्चित टेलिशृंखला ‘महाभारत’मा अश्वत्थामाको भूमिका निर्वाह गरेका थिए । उक्त भूमिकाले उनलाई भारतीय दर्शकमाझ अझ व्यापक रूपमा चिनाएको थियो । त्यसैगरी ‘सरफरोस’, ‘लगान’ र ‘गजिनी’ लगायत चर्चित चलचित्रमा समेत उनले प्रभावशाली अभिनय गरेका थिए ।

भारतीय चलचित्रमा लामो समयदेखि सक्रिय रहेका रावतको नेपाली चलचित्रसँग पनि निकट सम्बन्ध थियो । उनले नेपाली निर्देशक चन्द्र पन्तको निर्देशनमा बनेका चलचित्रमा अभिनय गरेका थिए । रावतले ‘आ बाट आमा’ र ‘ह्रस्व दीर्घ’ मा समेत काम गरेका थिए ।
अभिनेत्री विपना थापासँग उनको नेपाली चलचित्रमा सहकार्य भएको थियो । रावतले पछिल्लो समय नेपाली चलचित्र ‘आ बाट आमा–२’ को

छायांकनसमेत पूरा गरेका थिए । नेपाली चलचित्रमा उनको सहभागिताले भारतीय र नेपाली चलचित्र क्षेत्रबीचको सहकार्यलाई समेत थप बलियो बनाएको थियो ।

रावतको निधनपछि नेपाली चलचित्रकर्मी तथा भारतीय कलाकारहरूले सामाजिक सञ्जालमार्फत दुःख व्यक्त गरिरहेका छन् । चरित्रअनुसारको अभिनय र विशेषगरी नकारात्मक भूमिकामा प्रभाव छाड्न सफल रावतको निधनलाई भारतीय चलचित्र क्षेत्रले ठूलो क्षतिको रूपमा लिएको छ ।

दशकौँ लामो अभिनय यात्रामा विभिन्न भाषाका चलचित्र तथा टेलिशृंखलामा काम गरेका रावतले दर्शकमाझ आफ्नो छुट्टै परिचय स्थापित गरेका थिए । उनको निधनसँगै भारतीय चलचित्र क्षेत्रले अनुभवी र प्रभावशाली कलाकार गुमाएको छ ।