हरि लम्साल निर्देशित चलचित्र ‘बाः एक योद्धा’ले बक्सअफिसमा उत्साहजनक प्रदर्शन गरिरहेको छ । दर्शकबाट सकारात्मक प्रतिक्रिया पाइरहेको चलचित्रले प्रदर्शनको तेस्रो सातामा प्रवेश गर्दा तीन करोड रुपैयाँभन्दा बढी ग्रसकलेक्सन गरेको छ ।

चलचित्र विकास बोर्डले सोमबार सार्वजनिक गरेको तथ्यांकअनुसार चलचित्रले आइतबारसम्म तीन करोड पाँच लाख २२ हजार ५०२ रुपैयाँ ग्रसकलेक्सन गरेको छ । यस अवधिमा एक लाख सात हजार ५३३ जना दर्शकले चलचित्र हेरेका छन् । अहिले पनि चलचित्रले हलमा राम्रो अकुपेन्सी कायम राखेको जनाइएको छ ।

प्रदर्शनको सुरुवाती दिनमा अपेक्षाकृत सुस्त देखिएको चलचित्रले दर्शकबाट प्राप्त सकारात्मक प्रतिक्रियासँगै व्यापारमा गति लिएको थियो । प्रदर्शनको १० दिनमा एक करोड ९३ लाख छ हजार ४६५ रुपैयाँ ग्रसकलेक्सन गरेको चलचित्रले त्यसपछि पनि आफ्नो कमाइ बढाउँदै लगेको हो ।

‘बाः एक योद्धा’ले नेपाली समाजमा बाबुले सन्तानको भविष्य निर्माणका लागि गर्ने त्याग, संघर्ष र समर्पणको कथा प्रस्तुत गरेको छ । सन्तानका सपना पूरा गर्न अभिभावकले जीवनभर गर्ने संघर्षसँगै वृद्धावस्थामा उनीहरूले भोग्नुपर्ने उपेक्षा र पीडालाई चलचित्रले भावनात्मक रूपमा उठाएको छ ।

चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापालगायतका कलाकारले अभिनय गरेका छन् ।

आर्टिस्टिक इन्टरटेनमेन्टको ब्यानरमा निर्माण भएको चलचित्रका लेखक तथा निर्देशक हरि लम्साल हुन् । चलचित्रको कथा र पटकथा पनि लम्सालले नै तयार पारेका हुन् ।

वसन्त लम्साल निर्माता रहेको चलचित्रमा अनिल बुढाथोकी कार्यकारी निर्माता, अर्जुन पौडेल लाइन प्रोड्युसर र कृष्ण काफ्ले सह–निर्माताका रूपमा रहेका छन् ।