नेपाली चलचित्र ‘गौथली’ले अन्तर्राष्ट्रिय मञ्चमा अर्को उपलब्धि थपेको छ । चलचित्रका निर्देशक डा. कपिल रिजाल फ्रान्समा आयोजित RED Movie Awards 2026 को Autumn Edition अन्तर्गत ‘Best Director (Man)’ विधामा विजेता बनेका छन् ।

अवार्डको आधिकारिक वेबसाइटमा सार्वजनिक गरिएको अन्तिम विजेता सूचीअनुसार डा. रिजालले चलचित्र ‘गौथली’मार्फत उक्त सम्मान प्राप्त गरेका हुन् । उनको यो उपलब्धिलाई नेपाली चलचित्रको सिर्जनात्मक क्षमता र अन्तर्राष्ट्रिय पहिचान विस्तारको दृष्टिले महत्त्वपूर्ण मानिएको छ ।

अन्तर्राष्ट्रिय अवार्डमा प्राप्त यो सफलताले निर्देशक रिजालको कामलाई थप चिनाउनुका साथै नेपाली चलचित्रलाई विश्वमाझ पुर्‍याउन सहयोग पुग्ने अपेक्षा गरिएको छ । नेपाली कथावस्तु र सिर्जनालाई अन्तर्राष्ट्रिय दर्शकमाझ स्थापित गर्ने प्रयासमा यस उपलब्धिले थप ऊर्जा प्रदान गर्ने विश्वास गरिएको छ ।

यस सफलतापछि निर्देशक रिजाललाई परिवारका सदस्य, आफन्त, शुभचिन्तक तथा चलचित्रप्रेमीहरूले बधाई दिँदै आगामी दिनमा अझ उत्कृष्ट काम र थप अन्तर्राष्ट्रिय सफलता हासिल गर्न शुभकामना व्यक्त गरेका छन् । ‘गौथली’लाई माया र साथ दिने दर्शकप्रति पनि आभार प्रकट गरिएको छ ।

‘गौथली’ले प्राप्त गरेको यो सम्मान एउटा अवार्डमा मात्र सीमित नभई नेपाली चलचित्रकर्मीको मेहनत, सिर्जनशीलता र अन्तर्राष्ट्रियस्तरमा प्रतिस्पर्धा गर्न सक्ने क्षमताको प्रतिनिधित्व गर्ने उपलब्धिका रूपमा हेरिएको छ ।