चलचित्र ‘बाटुलो जून’ मा समावेश गीत ‘मेरो मन चोर्‍यो सुटुक्कै’ युट्युबको नेपालतर्फको भिडियो ट्रेन्डिङमा पहिलो स्थानमा पुगेको छ । घटस्थापनाको दिन सार्वजनिक गरिएको गीतले दुई दिनमै पाँच लाखभन्दा बढी पटक हेरिने सफलता हासिल गरेको हो ।

गीतको भिडिओले छोटो समयमै दर्शकको उल्लेख्य साथ पाउँदै ट्रेन्डिङको शीर्ष स्थान ओगटेको निर्माण पक्षले जनाएको छ । निर्माण टोलीले गीतमा प्राप्त भ्युजलाई स्वाभाविक अर्थात् अर्गानिक प्रतिक्रिया भएको दाबी गरेको छ । गीतको लोकप्रियतासँगै चलचित्र ‘बाटुलो जून’ को प्रचारप्रसारसमेत थप तीव्र बनेको छ ।

गीतको भिडिओमा अभिनेता अनमोल केसी र डेब्यु अभिनेत्री प्रिन्सी खतिवडा देखिएका छन् । अनमोल र प्रिन्सीको उपस्थितिले गीतप्रति दर्शकको आकर्षण बढाएको देखिन्छ । यसैबीच, चलचित्रको टिजर पनि युट्युबको चलचित्र विधातर्फको चार्टमा पहिलो स्थानमा रहेको जनाइएको छ ।

भुवन केसीको निर्देशनमा बनेको चलचित्रको लेखन सामीप्यराज तिमल्सेना र सरिन पोखरेलले गरेका हुन् । जिया केसी र भविष्य खड्का निर्माता रहेको चलचित्र आगामी कात्तिक २६ गतेदेखि प्रदर्शनमा आउने तयारीमा छ ।

गीत र टिजरले अनलाइनमा पाएको प्रतिक्रियाले प्रदर्शनअघि नै ‘बाटुलो जून’ प्रति दर्शकको चासो बढाएको छ । अब युट्युबमा देखिएको यो लोकप्रियता चलचित्रको प्रदर्शन र व्यावसायिक सफलतामा कति रूपान्तरण हुन्छ भन्ने प्रतीक्षा गरिएको छ ।