निर्देशक माओत्से गुरुङले तयार पारेको नेपाली फिल्म ‘पेन्सन पट्टा’ को टिजर सार्वजनिक गरिएको छ। हरितालिका तीजलाई लक्षित गर्दै निर्माण गरिएको यो फिल्म आगामी भदौ २६ गते (सेप्टेम्बर ११, २०२६) देखि देशभर प्रदर्शनमा आउने तयारीमा छ। टिजरले लाहुरे समुदायको जीवनशैली, पारिवारिक सम्बन्ध र भावनात्मक द्वन्द्वलाई केन्द्रमा राखेको संकेत दिएको छ।

फिल्ममा दयाहाङ राई, गौमाया गुरुङ, विल्सन विक्रम राई, बुद्धि तामाङ, पशुपति राई, विश्वास गुरुङ, माया गुरुङ, पुष्कर बहादुर गुरुङ, लुनिभा तुलाधर, सुरज तमु, राज कौछा मगर, यासिली योख्खा, डीबी गुरुङ, प्रतिक्षा गुरुङ, सोल गुरुङ, मनोज गुरुङ, अनुषा राई र कुबिना गुरुङ लगायत कलाकारको अभिनय रहेको छ। साथै स्वर्गीय सुनील थापा पनि फिल्ममा देखिनेछन्।

टिजरमा एउटा परिवारले भोगेको अनपेक्षित समस्यालाई कथाको मुख्य आधार बनाइएको देखिन्छ। बाबुको निधनपछि उनको पेन्सन पट्टा मा आफ्नी आमाको नाम नभई परिवारलाई कहिल्यै थाहा नभएकी पहिलो पत्नीको नाम रहेको खुलासा भएपछि उत्पन्न हुने अन्योल र खोजीले कथालाई अघि बढाउने संकेत टिजरले दिएको छ।

माओत्से गुरुङ स्वयंले लेखेको कथा र निर्देशनमा निर्माण भएको यो फिल्म माओत्से गुरुङ फिल्म्स को ब्यानरमा बनेको हो। निर्माण पक्षले ग्रामीण नेपाली परिवेश, लाहुरे संस्कार र मानवीय सम्बन्धका जटिल पक्षलाई यथार्थपरक ढंगले प्रस्तुत गर्ने प्रयास गरेको जनाएको छ।

फिल्मको प्रचार सामग्री सार्वजनिक हुनुअघि नै यसको बेलायत र हङकङ प्रदर्शन अधिकार बिक्री भइसकेको जानकारी सार्वजनिक भइसकेको थियो। यसले अन्तर्राष्ट्रिय बजारमा पनि फिल्मप्रति चासो रहेको देखाएको छ।

टिजर सार्वजनिक भएसँगै ‘पेन्सन पट्टा’ ले दर्शकमाझ थप चर्चा पाउने अपेक्षा गरिएको छ। भावनात्मक पारिवारिक कथा बोकेको यो फिल्म भदौ २६ गतेदेखि नेपालभरका हलमा प्रदर्शनमा आउनेछ।