न्यान्सी खड्का अभिनीत ‘अक्षरा’को टिजर सार्वजनिक, वैवाहिक हिंसाको कथ
पूर्वमिस नेपाल इन्टरनेसनल न्यान्सी खड्काको शीर्ष भूमिका रहेको चलचित्र ‘अक्षरा’को टिजर सार्वजनिक गरिएको छ । सार्वजनिक टिजरले चलचित्रको कथावस्तु र पात्रहरूले भोग्ने पारिवारिक परिस्थितिबारे संकेत गरेको छ ।

विनयराज पौडेलको निर्देशनमा बनेको चलचित्रले धनाढ्य परिवारमा विवाह गरेपछि एक युवतीले सामना गर्नुपर्ने पारिवारिक पीडा र घरेलु हिंसाको कथालाई केन्द्रमा राखेको देखिन्छ । छोरीको विवाह गराउँदा हुने परिवार र चरित्रको वास्तविकता नबुझी अनुहार तथा धनसम्पत्तिलाई मात्रै आधार बनाउँदा निम्तिन सक्ने परिणामलाई चलचित्रले प्रस्तुत गर्ने देखिएको छ ।
टिजरमा न्यान्सी खड्का छोरीको भूमिकामा देखिएकी छन् भने सुशील पोखरेलले उनका बुबाको भूमिका निर्वाह गरेका छन् । सुशील सिटौला न्यान्सीका श्रीमानको भूमिकामा छन् । श्रीमतीमाथि हिंसा गर्ने तथा आफ्नो पारिवारिक हैसियतको धाक देखाउने चरित्रमा सिटौलालाई प्रस्तुत गरिएको छ ।

क्षित बाबु प्रोडक्सन हाउसको ब्यानरमा निर्माण भएको चलचित्रमा सोनी थापा निर्माता तथा उग्रसेन ढुङ्गाना र सुग्रसेन ढुङ्गाना निर्माता रहेका छन् । पारिवारिक सम्बन्ध, विवाहपछि महिलाले भोग्नुपर्ने हिंसा र सामाजिक सोचलाई कथाको आधार बनाएको ‘अक्षरा’ भदौ २६ गतेदेखि देशभर प्रदर्शनमा आउने तयारीमा छ ।