सामाजिक सञ्जाल प्लेटफर्म टिकटकले बालबालिकाको अनलाइन गोपनीयता उल्लङ्घनसम्बन्धी अमेरिकी मुद्दा टुंग्याउन ४० करोड अमेरिकी डलर तिर्न सहमत भएको छ ।

अमेरिकी न्याय विभागका अनुसार टिकटक र यसको मूल कम्पनी बाइटडान्सले १३ वर्षमुनिका लाखौँ प्रयोगकर्ताको ठूलो मात्रामा व्यक्तिगत विवरण संकलन गरेको आरोपमा उक्त रकम तिर्न लागेका हुन् । यो बालबालिकाको डिजिटल गोपनीयतासम्बन्धी अमेरिकामा भएको ठूलो जरिवाना तथा सम्झौतामध्ये एक मानिएको छ ।

सम्झौताअनुसार टिकटक र बाइटडान्सले तत्काल ३० करोड डलर अमेरिकी न्याय विभागलाई बुझाउनेछन् । बाँकी १० करोड डलर भने सन् २०१९ मा संघीय व्यापार आयोगसँग भएको सहमति आदेश हटाइएपछि तिर्नुपर्नेछ ।

अमेरिकामा सन् २००० देखि लागू बालबालिकाको अनलाइन गोपनीयता संरक्षण ऐन (सीओपीपीए) ले १३ वर्षमुनिका बालबालिकाको व्यक्तिगत जानकारी संकलन गर्नुअघि अभिभावकको अनुमति लिनुपर्ने व्यवस्था गरेको छ ।

अमेरिकी अधिकारीहरूले सन् २०२४ मा मुद्दा दायर गर्दा टिकटकले उमेर पहिचान प्रभावकारी रूपमा नगरेको र कम उमेरका प्रयोगकर्ताका लागि आवश्यक अभिभावकीय सहमति नलिएको आरोप लगाएका थिए ।

टिकटकको पूर्ववर्ती कम्पनी म्युजिकल्लीले पनि सन् २०१९ मा सीओपीपीए उल्लङ्घनको आरोपमा ५७ लाख डलर जरिवाना तिरेको थियो । त्यसबेला कम्पनीलाई १३ वर्षमुनिका प्रयोगकर्ताका लागि अभिभावकीय सहमति सुनिश्चित गर्न निर्देशन दिइएको थियो ।

अमेरिकी न्याय विभागले पछिल्लो सम्झौतासँगै टिकटकको स्वामित्व, गोपनीयता नीति तथा कम उमेरका प्रयोगकर्तामाथि प्लेटफर्मको नियन्त्रणलगायत क्षेत्रमा सुधार आएको जनाएको छ ।