शुक्रबारबाट प्रदर्शनमा आएको चलचित्र ‘बाः एक योद्धा’ले पाँचौँ दिनसम्म आइपुग्दा हलमा दर्शकको उपस्थिति बढाउन थालेको छ । प्रदर्शनका सुरुवाती तीन दिन लगातार परेको वर्षाले व्यापार प्रभावित भए पनि मंगलबारदेखि चलचित्रले गति लिन थालेको निर्माण पक्षको भनाइ छ ।

मंगलबारदेखि लागू भएको ‘डिल डे’अन्तर्गत ५० प्रतिशत छुटको प्रभावसँगै चलचित्रका अधिकांश शोमा दर्शकको चाप बढेको बताइएको छ । मंगलबार देशभर ७९ शोमा प्रदर्शन भएको चलचित्रका धेरै शो हाउसफुल भएको वितरक पक्षले जनाएको छ ।

दर्शकको माग बढेसँगै बुधबार चलचित्रको शो संख्या पनि थपिएको छ । वितरकका अनुसार देशभर ‘बाः एक योद्धा’ले १०० भन्दा बढी शो पाएको छ । काठमाडौं उपत्यकाका मल्टिप्लेक्सदेखि मोफसलका हलसम्म थप शो थपिँदै गएको जनाइएको छ ।

चलचित्रप्रति दर्शकको प्रतिक्रियामा यसको भावनात्मक पक्षले बढी प्रभाव पारेको देखिन्छ । चलचित्र हेरेपछि आफू भावुक भएको, रोएको तथा कथाका कतिपय प्रसंग आफ्नै परिवार वा आफन्तको जीवनसँग मेल खाएको दर्शकहरूले प्रतिक्रिया दिएका छन् ।

विशेषगरी सन्तानको भविष्यका लागि आमाबाबुले गर्ने त्याग, संघर्ष र समर्पणलाई चलचित्रले प्रस्तुत गरेको भन्दै दर्शकले प्रशंसा गरेका छन् । कतिपय दर्शकले चलचित्र हेरेपछि आफ्ना बाबुआमाको सम्झना आएको भन्दै आफ्ना सन्तानलाई पनि यस्तो कथा देखाउनुपर्ने धारणा राखेका छन् ।

सन्तानले आफ्ना अधिकारका लागि आवाज उठाउनु स्वाभाविक भए पनि बाबुआमाप्रतिको जिम्मेवारी भुल्न नहुने सन्देश चलचित्रले दिएको दर्शकको बुझाइ छ । वृद्धावस्थामा आमाबाबुले सन्तानबाट भोग्नुपर्ने उपेक्षा तथा उनीहरूले जीवनभर गरेको त्यागलाई चलचित्रले भावनात्मक ढंगले उठाएको प्रतिक्रिया दर्शकबाट आएको छ ।

प्रदर्शनको पहिलो दिनदेखि नै विभिन्न हलमा पुगेर दर्शकसँग साक्षात्कार गरिरहेको चलचित्रको कलाकार टोलीले मंगलबारदेखि बढेको दर्शकको उपस्थितिले आफूहरूलाई थप उत्साहित बनाएको जनाएको छ । कलाकारहरू हलमै पुगेर दर्शकसँग चलचित्रबारे प्रतिक्रिया लिइरहेका छन् ।

‘बाः एक योद्धा’को कथा सन्तानको भविष्य निर्माणका लागि बाबुले गर्ने संघर्ष, त्याग र जीवनभर सामना गर्ने चुनौतीमा केन्द्रित छ । सन्तानका इच्छा पूरा गर्न आमाबाबुले गर्ने संघर्षदेखि वृद्ध अवस्थामा उनीहरूले भोग्नुपर्ने एक्लोपन, उपेक्षा र पीडासम्मका विषय कथामा समेटिएका छन् ।

चलचित्रमा दिव्यदेव, झरना थापा, सुहाना थापा, माओत्से गुरुङ, अनिल बुढाथोकी, सागर खनाल, शिशिर सिवाकोटी, सुप्रज्ञा शर्मा र शवि थापालगायतको अभिनय छ ।

हरि लम्सालको लेखन तथा निर्देशनमा बनेको चलचित्र आर्टिस्टिक इन्टरटेनमेन्टको ब्यानरमा निर्माण भएको हो । कथा तथा पटकथा पनि निर्देशक लम्सालकै हो ।

वसन्त लम्साल निर्माता रहेको चलचित्रमा अनिल बुढाथोकी कार्यकारी निर्माता, अर्जुन पौडेल लाइन प्रोड्युसर र कृष्ण काफ्ले सह–निर्माताका रूपमा छन् ।