lनेपाली चलचित्रका लागि दशैँलाई महत्वपूर्ण व्यापारिक समयका रूपमा लिइन्छ । यही अवसरलाई लक्षित गर्दै यस वर्ष दशैँको आसपास थुप्रै नेपाली चलचित्र प्रदर्शनमा आउँदैछन् । तीमध्ये ‘१२ गाउँ २’, ‘आ बाट आमा २’, ‘छ माया छपक्कै २’ र ‘कबड्डी ५ : आफ्टर द फाइनल म्याच’ मुख्य चर्चामा छन् ।

सफल चलचित्रका सिक्वेल एकपछि अर्को प्रदर्शनमा आउन लागेपछि यस वर्षको दशैँमा नेपाली फिल्मबीचको प्रतिस्पर्धा थप रोचक बन्ने देखिएको छ ।

असोज ३० गते ‘१२ गाउँ २’ प्रदर्शनमा आउँदैछ । अभिनेता विराज भट्टको निर्देशन तथा अभिनय रहेको यो एक्सनप्रधान चलचित्रमा विराज भट्ट, समीर भट्ट, अनुपविक्रम शाही, प्रकाश शाह, सुनिल पोखरेल, काफिया शाही, वर्षा इटानी र खुसी कार्कीलगायत कलाकारको अभिनय छ । सन्तोष सरकारले कथा तथा पटकथा लेखेको फिल्ममा एक्सनलाई प्रमुख आकर्षणका रूपमा प्रस्तुत गरिएको छ ।

‘१२ गाउँ’को पहिलो भाग सन् २०२४ को दशैँमा प्रदर्शन भएको थियो । पहिलो भागको सफलतापछि दोस्रो भाग निर्माण गरिएको हो । पहिलो चलचित्रबाट विराज भट्टका छोरा समीर भट्टले नेपाली चलचित्रमा डेब्यु गरेका थिए । दोस्रो भागमा पनि विराज र समीरलाई महत्वपूर्ण भूमिकामा प्रस्तुत गरिएको छ ।

सोही असोज ३० गते ‘आ बाट आमा २’ पनि प्रदर्शनमा आउँदैछ । चन्द्र पन्तको लेखन तथा निर्देशन रहेको फिल्ममा पल शाह, मलिका महत, रिश्ता गुरुङ, विपना थापा, आकाश श्रेष्ठ, सविन श्रेष्ठ, निकिता आचार्य, साइग्रेस पोखरेल, गजित विष्ट र नरेन खड्कालगायत कलाकार छन् । पारिवारिक तथा भावनात्मक कथामा आधारित चलचित्रमा आमा–छोराको सम्बन्ध र पारिवारिक भावनालाई मुख्य विषय बनाइएको छ ।

‘आ बाट आमा’को पहिलो भागले दर्शकबाट राम्रो प्रतिक्रिया पाएपछि दोस्रो श्रृंखला निर्माण गरिएको हो । दोस्रो भागमा केही पुराना कलाकारसँगै नयाँ कलाकारलाई पनि समेटिएको छ । चलचित्रको छायांकन नेपालसँगै बेलायत र हङकङमा गरिएको निर्माण पक्षले जनाएको छ ।

त्यसको भोलिपल्ट अर्थात् असोज ३१ गते फूलपातीका दिन ‘छ माया छपक्कै २’ प्रदर्शनमा आउँदैछ । दीपेन्द्र लामाको निर्देशन रहेको फिल्ममा दीपकराज गिरी, केकी अधिकारी, सनिशा भट्टराई, दीपाश्री निरौला, निर्मल शर्मा र प्रकाश घिमिरेलगायत कलाकार छन् । दीपकराज गिरी र दीपेन्द्र लामाको पटकथा रहेको चलचित्रमा सामाजिक तथा राजनीतिक विषयलाई हास्यव्यङ्ग्य शैलीमा प्रस्तुत गरिएको छ ।

‘छ माया छपक्कै’को पहिलो भाग सन् २०१९ मा प्रदर्शन भएको थियो । पहिलो भागमा दीपकराज गिरी, केकी अधिकारी, केदार घिमिरे र जितु नेपाललगायत कलाकार थिए । चलचित्रको लोकप्रियतापछि दोस्रो भाग निर्माण गरिएको हो । यसपटक पनि हास्यव्यङ्ग्यसँगै समसामयिक सामाजिक तथा राजनीतिक विषयलाई कथामा समेटिएको निर्माण पक्षको भनाइ छ ।

दशैँको बिदा सकिन नपाउँदै कात्तिक ६ गते ‘कबड्डी ५ : आफ्टर द फाइनल म्याच’ प्रदर्शनमा आउँदैछ । रामबाबु गुरुङको लेखन तथा निर्देशन रहेको फिल्ममा दयाहाङ राई, विजय बराल, बुद्धि तामाङ, विपिन कार्की, रिश्मा गुरुङ, सिर्जना गुरुङ, पुष्कर गुरुङ र कमलमणि नेपाललगायत कलाकार छन् । यो ‘कबड्डी’ शृङ्खलाको पाँचौँ भाग हो ।

‘कबड्डी’को पहिलो भाग सन् २०१४ मा प्रदर्शन भएको थियो । त्यसपछि ‘कबड्डी कबड्डी’, ‘कबड्डी कबड्डी कबड्डी’ हुँदै ‘कबड्डी ४ : द फाइनल म्याच’सम्म आइपुगेको यो शृङ्खलाले नेपाली चलचित्रमा आफ्नो छुट्टै पहिचान बनाएको छ । चौथो भागलाई अन्तिम भनिए पनि अहिले पाँचौँ भाग ‘आफ्टर द फाइनल म्याच’का रूपमा आउन लागेको हो ।

यसरी दशैँको आसपास चार चर्चित सिक्वेल चलचित्र प्रदर्शनमा आउँदा नेपाली फिल्म बजारमा महाभिडन्तको अवस्था बन्ने देखिएको छ । ‘१२ गाउँ २’ले एक्सन, ‘आ बाट आमा २’ले पारिवारिक भावना, ‘छ माया छपक्कै २’ले हास्यव्यङ्ग्य तथा सामाजिक–राजनीतिक विषय र ‘कबड्डी ५’ले स्थापित पात्र तथा कथालाई निरन्तरता दिँदै दर्शक तान्ने तयारी गरेका छन् ।

दशैँको लामो बिदा, चर्चित कलाकार र अघिल्ला भागको लोकप्रियताका कारण यी चलचित्रप्रति दर्शकको चासो बढेको छ । अब यी फिल्मले हलमा कस्तो प्रतिक्रिया पाउँछन्, कति दर्शक तान्छन् र बक्स अफिसमा कस्तो व्यापार गर्छन् भन्ने विषय भने प्रदर्शनपछि नै स्पष्ट हुनेछ ।