मिस नेपाल इन्टरनेसनलको उपाधिसँगै चर्चामा आएकी अभिनेत्री नीति शाहले फिल्मी करिअरमा अपेक्षित सफलता हासिल गर्न सकेकी छैनन् । आकर्षक व्यक्तित्व र चर्चित मोडलिङ पृष्ठभूमिका कारण फिल्ममा प्रवेश गर्दा उनीप्रति दर्शकको ठूलो अपेक्षा थियो । तर, ठूलो पर्दामा उनको यात्रा भने लगातार असफलतातर्फ धकेलिएको देखिएको छ ।

नीतिले अभिनयमा डेब्यू गर्दा नेपाली फिल्मका चर्चित अभिनेता अनमोल केसी र प्रदीप खड्कासँग काम गर्ने आफ्नो चाहना रहेको बताएकी थिइन् । तर, उनको पहिलो फिल्म ‘खजुरे ब्रो’मा रेयर राई उनका जोडी बने । फिल्म २०८१ साल वैशाखमा प्रदर्शनमा आएको थियो ।

डेब्यू फिल्मबाटै नीति सफलताको स्वाद चाख्नबाट वञ्चित भइन् । ‘खजुरे ब्रो’ले बक्स अफिसमा अपेक्षित व्यापार गर्न सकेन । फिल्म असफल हुनुका साथै नीतिको अभिनयमाथि समेत प्रश्न उठ्यो । विशेषगरी उनको अभिनय क्षमता र स्क्रिप्ट छनोटलाई लिएर सामाजिक सञ्जालदेखि फिल्म क्षेत्रसम्म विभिन्न टिप्पणी भए ।

त्यसपछि नीति ‘ज्वाइँ साब’मा जितु नेपालसँग देखिइन् । दशैँको महत्वपूर्ण रिलिज डेटमा प्रदर्शनमा आएको यो फिल्मबाट पनि उनले ठूलो सफलता पाउन सकिनन् । फिल्ममा उनको उपस्थितिले दर्शक तान्ने अपेक्षा गरिए पनि त्यसको प्रभाव बक्स अफिसमा देखिएन । न उनको अभिनयले विशेष चर्चा पायो, न फिल्मले अपेक्षित व्यापार गर्न सक्यो ।

नीतिको तेस्रो, चौथो र पाँचौँ फिल्मका रूपमा ‘नरसिंहा अवतार’, ‘मोहोर’ र ‘कोशेढुङ्गा’ प्रदर्शनमा आए । यीमध्ये ‘मोहोर’ले तुलनात्मक रूपमा मध्यम व्यापार गरे पनि अन्य फिल्मले उल्लेख्य सफलता हासिल गर्न सकेनन् । ‘मोहोर’मा उनले अभिनेता पल शाहसँग स्क्रिन सेयर गरेकी थिइन् । चर्चित अभिनेता र नीतिको जोडीलाई लिएर दर्शकमा चासो भए पनि त्यसको प्रभाव फिल्मको समग्र सफलतामा ठूलो रूपमा देखिएन ।

लगातार फिल्म प्रदर्शनमा आए पनि नीति अझैसम्म आफूलाई सफल अभिनेत्रीका रूपमा स्थापित गर्न संघर्षरत देखिन्छिन् । उनको फिल्मी करिअरमा सबैभन्दा ठूलो समस्या स्क्रिप्ट छनोट भएको चर्चा हुँदै आएको छ । उनको व्यक्तित्व, बोल्ने शैली र सार्वजनिक छविअनुसार भूमिका तथा कथा छनोट गर्न नसकेको टिप्पणी फिल्म वृत्तमा हुँदै आएको छ ।

यही अवस्थामा उनको पछिल्लो फिल्म ‘जदौ’ प्रदर्शनमा आयो । फिल्ममा मुकुन भुसाल र प्रभातपाल ठकुरी मुख्य भूमिकामा छन् । ‘जदौ’बाट यसपटक भने नीति आफ्नो करिअरमा कम्तीमा व्यापारिक रूपमा केही राहत पाउने अपेक्षामा थिइन् । तर, नतिजा झन् निराशाजनक देखिएको छ ।

चलचित्र विकास बोर्डको तथ्यांकअनुसार असोज ९ देखि १८ गतेसम्मको १० दिनमा ‘जदौ’ले जम्मा १३ लाख ९८ हजार रुपैयाँको व्यापार गरेको छ । उक्त अवधिमा फिल्मका लागि ३ हजार ७१५ वटा टिकट बिक्री भएको जनाइएको छ । बक्स अफिसमा देखिएको यो व्यापारलाई कमजोर मात्र नभई फिल्मको करिअरकै ठूलो असफलतामध्ये एकका रूपमा हेरिएको छ ।

दोस्रो विकेन्डसम्म पुग्दा ‘जदौ’ अधिकांश हलबाट उत्रिसकेको अवस्था छ । फिल्ममा चर्चित अनुहारका रूपमा नीति शाह रहेकाले सुरुवाती दिनमा दर्शक तान्ने जिम्मेवारी पनि उनीमाथि थियो । तर, उनको लोकप्रियताको प्रभाव हलमा देखिन सकेन । यसले नीतिको स्टार भ्यालुमाथि समेत प्रश्न उठाएको छ ।

फिल्म क्षेत्रमा कुनै कलाकारको सफलता केवल व्यक्तिगत लोकप्रियताले मात्र निर्धारण हुँदैन । राम्रो कथा, बलियो चरित्र, अभिनय र दर्शकसँग जोडिने विषयवस्तु पनि उत्तिकै महत्वपूर्ण हुन्छन् । नीतिको हकमा भने अहिलेसम्म यी पक्षबीच सही संयोजन हुन नसकेको देखिन्छ ।

लगातार फिल्म असफल भएपछि अब नीतिले आगामी दिनमा कस्तो फिल्म रोज्छिन् भन्ने चासो बढेको छ । उनको मोडलिङ पृष्ठभूमि र आकर्षक व्यक्तित्वलाई फिल्मी पर्दामा सही रूपमा प्रयोग गर्न सक्ने भूमिका र कथा छनोट गर्न सके करिअरलाई पुनः गति दिन सक्ने सम्भावना भने कायमै छ ।

तर, अहिलेको अवस्थालाई हेर्दा नीति शाहका लागि ‘जदौ’ अर्को निराशाजनक अध्याय बनेको छ । डेब्यूदेखि नै सफल फिल्मको खोजीमा रहेकी नीतिले पाँचभन्दा बढी फिल्ममा काम गरिसक्दा पनि बक्स अफिसमा आफूलाई बलियो रूपमा स्थापित गर्न सकेकी छैनन् । त्यसैले अब उनको फिल्मी करिअरमा सबैभन्दा ठूलो चुनौती भनेकै सही स्क्रिप्ट छनोट गर्दै सफल फिल्ममार्फत आफ्नो स्टार छवि स्थापित गर्नु हुनेछ ।