अभिनेता विराज भट्टको निर्देशन तथा निर्माणमा बनेको चलचित्र ‘१२ गाउँ २’ प्रदर्शनको तयारीमा छ । रिलिज मिति नजिकिँदै गर्दा चलचित्रका प्रचार सामग्रीले दर्शकमाझ उत्सुकता बढाइरहेका छन् । एक्सनले भरिएको टिजरबाट चर्चा कमाएको फिल्मले पछिल्ला गीतमार्फत आफ्नो कथाको प्रेमिल र भावनात्मक पक्ष पनि उजागर गरिरहेको छ ।

प्रचार अभियानअन्तर्गत सार्वजनिक गरिएको ‘जुनेली’ चलचित्रको पहिलो गीत थियो । सुगम पोखरेलको स्वरमा रहेको गीतमा समीर भट्ट र कृशु शाहीलाई रोमान्टिक अवतारमा प्रस्तुत गरिएको थियो । गीतमा उनीहरूको नृत्यसँगै समीरको डान्स र ब्रेकडान्सले समेत दर्शकको ध्यान खिचेको थियो ।

त्यसपछि आएको ‘लालीगुराँस’ले समीर र कृशुको प्रेम सम्बन्धलाई थप प्रस्ट पारेको थियो । एक्सनप्रधान टिजर हेरेपछि फिल्ममा द्वन्द्व र बदलाको कथा मात्रै केन्द्रमा होला भन्ने अनुमान भइरहेका बेला यो गीतले चलचित्रमा प्रेमकथाले पनि महत्वपूर्ण स्थान ओगटेको संकेत दिएको थियो ।

अब निर्माण पक्षले बुधबार ‘रेशमी रुमाल’ सार्वजनिक गरेको छ । गीतको भिडियोमा विराज भट्ट र वर्षा इटानीको जोडीलाई प्रस्तुत गरिएको छ । अघिल्ला प्रचार सामग्रीभन्दा फरक स्वाद दिने प्रयास गरिएको यो गीतले ‘१२ गाउँ २’को कथामा प्रेम र सम्बन्धको पाटो पनि महत्वपूर्ण रहेको संकेत गर्छ ।

निर्माण पक्षले चलचित्रका गीतलाई केवल प्रचारका लागि मात्र प्रयोग नगरी कथासँग जोड्ने प्रयास गरेको देखिन्छ । ‘जुनेली’मार्फत समीर–कृशुको जोडीलाई चिनाइएको थियो भने ‘लालीगुराँस’ले उनीहरूको प्रेमलाई अझ नजिकबाट प्रस्तुत गर्‍यो । ‘रेशमी रुमाल’ले भने विराज र वर्षाको सम्बन्धतर्फ दर्शकको ध्यान मोडेको छ ।

फिल्मको मुख्य आकर्षण भने एक्सन नै रहने देखिन्छ । टिजर सार्वजनिक हुँदा नै निर्माण पक्षले द्वन्द्व, बदलाको कथा र एक्सनलाई प्राथमिकतामा राखेको स्पष्ट पारेको थियो । तर क्रमशः सार्वजनिक भइरहेका गीतले चलचित्रमा एक्सनसँगै प्रेम, भावना र पारिवारिक सम्बन्धका आयाम पनि रहेको देखाइरहेका छन् ।

यसले ‘१२ गाउँ २’प्रतिको दर्शकको अपेक्षा अझ फराकिलो बनाएको छ । एक्सन हेर्न हल पुग्ने दर्शकले प्रेमकथा र भावनात्मक उतारचढावसमेत अनुभव गर्न पाउने संकेत चलचित्रका प्रचार सामग्रीले दिएका छन् ।

चलचित्रमा विराज भट्ट, समीर भट्ट, कृशु शाही र वर्षा इटानीसँगै अनुपविक्रम शाही, प्रकाश शाह, सुनील पोखरेल, कालु राना, खुसी कार्की, पुष्कर भट्ट, राज हमाल, प्रजल दुलाल, कमल देवकोटा, साहित सिंह ठकुरी, अर्जुन आचार्य, शिवा सिंह, नेहा आर शाह, पूर्णबहादुर गन्धर्व र सुदीर श्रेष्ठलगायत कलाकारको अभिनय छ । कृशु शाही र वर्षा इटानीले यही चलचित्रबाट नेपाली रजतपटमा डेब्यु गर्दैछन् ।

दशैंको अवसर पारेर असोज ३० गतेबाट प्रदर्शनमा आउन लागेको ‘१२ गाउँ २’ले एक्सन, प्रेम, नयाँ पुस्ताका कलाकार र विराज भट्टको ब्रान्ड भ्यालुलाई आफ्नो मुख्य आकर्षणका रूपमा अघि सारेको छ । यसले दशैंको बिदामा दर्शक तान्ने अपेक्षा गरिएको छ ।

चलचित्रमा युग भुसाल र डीपी खनालको संगीत, बन्दे प्रसादको सम्पादन, रामजी लामिछाने र सियोन श्रेष्ठको नृत्य निर्देशन तथा स्टन्ट सिल्भा र शंकर महर्जनको द्वन्द्व निर्देशन रहेको छ ।

सिनेमाको वितरण काफिया फिल्मस् र कुबेर सिनेमाले गर्नेछन् ।