निर्देशक दीपेन्द्र के खनालले आफ्नो नयाँ चलचित्र ‘श्रीमान् श्रीमती’को छायांकन गोप्य रूपमा अघि बढाइरहेका छन् । औपचारिक घोषणा नगरी सुरु गरिएको चलचित्रको छायांकन अहिले अन्तिम चरणमा पुगेको छ ।

काठमाडौंका विभिन्न स्थानमा चलचित्रको छायांकन भइरहेको छ । निर्देशक खनालका अनुसार अब करिब एक साताभित्र छायांकन पूरा हुनेछ । निर्माण टिमले चलचित्रको विषयवस्तु र निर्माण प्रक्रियालाई सकेसम्म सार्वजनिक नगरी काम अघि बढाएको हो ।

पटकथा प्रोडक्सन र टुकी आर्ट्सको प्रस्तुतिमा निर्माण भइरहेको ‘श्रीमान् श्रीमती’ पारिवारिक कथामा आधारित चलचित्र हो । फिल्ममा खगेन्द्र लामिछाने र सुरक्षा पन्त मुख्य भूमिकामा प्रस्तुत हुँदैछन् ।

सामाजिक तथा गम्भीर विषयलाई कथाको केन्द्रमा राखेर चलचित्र बनाउँदै आएका खनालले यसपटक भने पारिवारिक कथालाई रोजेका छन् । उनका अनुसार चलचित्रमा दर्शकले आफ्नै जीवनसँग जोड्न सक्ने सरल र मिठो कथा प्रस्तुत गर्ने प्रयास गरिएको छ ।

“दर्शकले मन पराउने मिठो कथामा सिनेमा बन्दैछ । आशा छ, दर्शकले मन पराउनु हुनेछ,” खनालले भनेका छन्, “हामीले इमान्दार भएर सिनेमा बनाउने हो । पक्कै पनि इमान्दार बनेर बनाइएको सिनेमा दर्शकको रोजाइमा पर्छ ।”

चलचित्रको प्रदर्शन मिति भने निर्माण पक्षले अहिलेसम्म सार्वजनिक गरेको छैन । छायांकन सम्पन्न भएपछि पोस्ट–प्रोडक्सनको काम अघि बढाइनेछ ।

खनालको पछिल्लो रिलिज चलचित्र ‘हरिबहादुरको जुत्ता’ हो । उनले ‘क्याप्टेन साब’को छायांकनसमेत पूरा गरिसकेका छन् । ‘क्याप्टेन साब’ भने प्रदर्शनको तयारीमा छ ।