दीपकराज गिरी र दीपाश्री निरौला समूहको चर्चित फिल्म फ्रेन्चाइज ‘छक्का पञ्जा’का केही श्रृंखलामा विवाहेत्तर सम्बन्धलाई कथाको केन्द्रमा राखिएको थियो । अब यही विषयलाई नयाँ ढंगले प्रस्तुत गर्दै ‘छ माया छपक्कै २’ निर्माण गरिएको संकेत फिल्मको नयाँ गीतले गरेको छ ।

बुधबार सार्वजनिक ‘मायामा एक्सपायरी डेट हुँदैन’ गीतको भिडियोले फिल्मको कथावस्तुबारे केही महत्वपूर्ण झलक दिएको छ । भिडियोमा दीपकराज गिरी र केकी अधिकारीलाई श्रीमान्–श्रीमतीको भूमिकामा देखाइएको छ । उनीहरू नवविवाहित जोडीको शैलीमा प्रस्तुत भएका छन् ।

तर, कथाले अर्को मोड लिँदा दीपकराज र सनिशा भट्टराईबीचको प्रेमसम्बन्ध देखाइएको छ । भिडियोमा केकी र सनिशा दुवै गर्भवती भएको दृश्यसमेत समावेश छ । यी दृश्यले फिल्मको कथा विवाहेत्तर सम्बन्ध वरिपरि घुम्ने संकेत गर्छ ।

सविन सुवेदी र सहिमा श्रेष्ठको स्वरमा रहेको गीतमा राजेन्द्र थापाको शब्द तथा दीपक शर्माको संगीत छ । ‘छक्का पञ्जा’का ‘देखन चम्पा’, ‘पहिलो नम्बरमा’ र ‘दर्शन सलाम’जस्ता लोकप्रिय गीतमा संगीत दिएका शर्माकै संगीत भएकाले नयाँ गीतले पनि दर्शकको ध्यान तान्ने अपेक्षा गरिएको छ । गीतको भिडियोमा किरण थापाको कोरियोग्राफी छ ।

दीपेन्द्र लामाको निर्देशनमा बनेको फिल्ममा दीपकराज, केकी र सनिशासँगै निर्मल शर्मा, कर्मा, जितु नेपाल, रिहान गिरीलगायत कलाकारको अभिनय छ । केही दिनअघि अमेरिकाबाट नेपाल फर्किएका केदार घिमिरे ‘माग्ने बुढा’ पनि फिल्ममा देखिनेछन् । उनको दृश्यको छायांकन काठमाडौंमा यसै साता गरिएको हो ।

फिल्मका निर्माता रोहित अधिकारी हुन् ।