रेखा थापाको निर्देशनमा तयार भएको चलचित्र ‘माया भनेकै यस्तो होला’को प्रदर्शन मिति सरेको छ । निर्माण पक्षले भदौ २६ गतेका लागि तय गरेको रिलिज स्थगित गर्दै नयाँ प्रदर्शन मिति सार्वजनिक गरेको हो ।

दिया एन्ड अमु फिल्म्स प्रा.लि.ले आइतबार जारी गरेको विज्ञप्तिअनुसार रसुवाको भोटेकोशी नदीमा आएको विनाशकारी बाढीपछि उत्पन्न असहज परिस्थितिलाई मध्यनजर गर्दै चलचित्रको प्रदर्शन तत्कालका लागि रोकिएको हो ।

निर्माता दिल श्रेष्ठले हस्ताक्षर गरेको विज्ञप्तिमा देश शोकमा रहेका बेला मनोरञ्जनात्मक चलचित्र प्रदर्शन गर्नु उपयुक्त नहुने निष्कर्षसहित रिलिज सारिएको उल्लेख छ । निर्माण टोलीले मुलुकको वर्तमान अवस्थाप्रति संवेदनशील हुँदै यस्तो निर्णय लिएको जनाएको छ ।

भदौ २६ को प्रदर्शन स्थगित भएपछि चलचित्र अब तिहारको अवसरमा कात्तिक २० गतेदेखि दर्शकमाझ आउने भएको छ । नयाँ मितिबारे मुख्य वितरकहरूलाई जानकारी गराइसकिएको निर्माण पक्षले जनाएको छ ।

अचानक प्रदर्शन मिति परिवर्तन गर्नुपरेकामा दर्शक तथा सम्बन्धित सरोकारवालामा पर्न गएको असुविधाप्रति निर्माण टोलीले क्षमासमेत मागेको छ ।

रेखा थापाको निर्देशन रहेको चलचित्रमा मदनकृष्ण श्रेष्ठ, दिल श्रेष्ठ, पूर्वमिस नेपाल सृष्टि श्रेष्ठ, नम्रता श्रेष्ठ तथा पूर्वमिस नेपाल इन्टरनेसनल नीति शाह प्रमुख भूमिकामा छन् । लक्ष्मी गिरी, रवि डंगोल, विशाल पहाडी, संगम भण्डारी, सुजाता श्रेष्ठ र बिनोद पौडेललगायत कलाकारको पनि अभिनय छ ।

हरि नारायण श्रेष्ठ, माया देवी श्रेष्ठ, नवराज श्रेष्ठ, जस्मिन श्रेष्ठ र प्रकाश श्रेष्ठ निर्माता रहेको चलचित्रमा ध्रुव लम्सालको पटकथा छ । सुमधुर प्रेमकथामार्फत सामाजिक भावना र परिवेशलाई प्रस्तुत गर्ने उद्देश्य चलचित्रले बोकेको निर्माण पक्षको भनाइ छ ।

सुदीप बरालको छायांकन, अनिरुद्ध आत्रेयको प्रमुख सहायक निर्देशन तथा राजन घिमिरेको फिल्म संयोजन रहेको चलचित्रमा प्रशान्त सिवाकोटीको संगीत छ । सुजेनी  मल्लले ड्रेस डिजाइन, प्रिया कार्कीले मेकअप र चुडामणी (सीएम)ले प्रोडक्सन सम्हालेका छन् ।