आगामी कात्तिक ३० गतेबाट प्रदर्शनको तयारीमा रहेको फिल्म ‘केटी हराएको सूचना’को दोस्रो टिजर सार्वजनिक गरिएको छ । सार्वजनिक गरिएको एक मिनेट लम्बाईको संवादविहीन टिजरमा प्रेम, द्वन्द्व र रहस्यलाई प्रस्तुत गरिएको छ । अभिनेता नाजिर हुसेन र अभिनेत्री सृष्टि श्रेष्ठलाई पछ्याएको टिजरमा उनीहरुको सम्बन्धमा आउने उतार(चढावलाई देखाइएको छ । टिजरको अन्त्यमा नाजिरलाई सृष्टिले बन्धक बनाएको दृश्य छ, जहाँ उनी नाजिरको घाँटीमा चक्कु राखेर रिसाहा भावमा देखिएकी छन् ।

३२ वर्षअघिको डकु(ड्रामा ‘उजेली’का निर्देशक दीपेन्द्र गौचनले निर्देशन गरेको यो फिल्ममा उनी स्वयंकै स्क्रिप्ट लेखन रहेको छ भने यसमा नाजिर र सृष्टिसँगै सञ्जय गुप्ता, रामनारायण ठाकुर, मदन ठाकुर, रिना रिमाल, कौशल्या ठाकुर, ललितादेवी मिश्र, रुपेश मण्डल, सुदीप पटेल लगायतको अभिनय रहेको छ । फिल्ममा अमर महर्जनको डीओपी, निमेष श्रेष्ठको सम्पादन, शंकर महर्जनको द्वन्द्व निर्देशन तथा राजीव कर्णको कोरियोग्राफी रहेको छ ।