प्रेमकथामा आधारित चलचित्र ‘माया भनेकै यस्तो होला’को शीर्ष गीत सार्वजनिक गरिएको छ । भदौ २६ गतेबाट प्रदर्शनमा आउन लागेको चलचित्रको निर्माण पक्षले शुक्रबार काठमाडौंमा आयोजित विशेष कार्यक्रममार्फत गीत दर्शकमाझ ल्याएको हो ।

सार्वजनिक गीतमा प्रशान्त शिवाकोटीको शब्द तथा संगीत रहेको छ भने उनले स्वयं विज्ञानी पराजुलीसँग मिलेर स्वर दिएका छन् । गीतले पहिलो भेटमै सुरु हुने आकर्षण, प्रेमको अनुभूति र त्यससँग जोडिने जीवनका कल्पनालाई प्रस्तुत गरेको छ ।

गीतको भाव युवा मनोविज्ञानमा केन्द्रित छ । सुन्दर युवतीलाई देखेपछि युवकको मनमा उठ्ने भावना, उसले बुन्ने सपनाहरू र प्रेमप्रतिको आकर्षणलाई गीतले चित्रण गरेको छ । भिडियोमा एक युवक र तीन युवतीबीचको सम्बन्धलाई देखाउँदै त्रिकोणात्मक मात्र नभई बहुआयामिक प्रेमको संकेत गरिएको छ ।

गम्भीर विष्टको कोरियोग्राफी रहेको भिडियोमा दिल श्रेष्ठ, सृष्टि श्रेष्ठ, नम्रता श्रेष्ठ र नीति शाहको आकर्षक प्रस्तुति देख्न सकिन्छ ।

चलचित्रलाई अभिनेत्री तथा निर्मात्री रेखा थापाले निर्देशन गरेकी हुन् । यसअघि ‘हिम्मतवाली’ र ‘मालिका’ निर्देशन गरिसकेकी रेखाको यो तेस्रो निर्देशकीय चलचित्र हो ।

‘दिया एण्ड अमु फिल्मस्’को ब्यानरमा निर्माण भइरहेको चलचित्रमा वरिष्ठ हास्यकलाकार मदनकृष्ण श्रेष्ठसहित दिल श्रेष्ठ, सृष्टि श्रेष्ठ, नम्रता श्रेष्ठ र पूर्व मिस नेपाल इन्टरनेसनल नीति शाह मुख्य भूमिकामा रहेका छन् । साथै लक्ष्मी गिरी, राजाराम पौडेल, विशाल पहाडी, संगम भण्डारी, सुजाता श्रेष्ठ र बिनोद पौडेललगायत कलाकारहरूको पनि अभिनय रहेको छ ।

ध्रुव लम्सालले लेखेको स्क्रिप्टमा आधारित चलचित्रले प्रेम कथामार्फत सामाजिक सम्बन्ध, भावना र मानवीय संवेदनालाई प्रस्तुत गर्ने निर्माण टिमको दाबी छ ।

चलचित्रका निर्माता हरि नारायण श्रेष्ठ, माया देवी श्रेष्ठ, नवराज श्रेष्ठ, जस्मिन श्रेष्ठ र प्रकाश श्रेष्ठ हुन् । सुदीप बरालले छायांकन गरेको चलचित्रमा अनिरुद्ध आत्रेय प्रमुख सहायक निर्देशकको रूपमा रहेका छन् । संगीत प्रशान्त शिवाकोटी, ड्रेस डिजाइन सुजेनी मल्ल, मेकअप प्रिया कार्की र प्रोडक्सन व्यवस्थापन सुमन तिवारीले सम्हालेका छन् ।

देशव्यापी प्रदर्शनका लागि चलचित्रको वितरण अधिकार रीच इन्टरटेन्मेन्ट, एप्पल इन्टरटेन्मेन्ट र एफडी कम्पनीले लिएका छन् । निर्माण पक्षका अनुसार चलचित्र प्रेम, सम्बन्ध र सामाजिक संवेदनाको संयोजनसहित दर्शकमाझ प्रस्तुत हुनेछ।