निर्देशक सौरभ चौधरीले नयाँ महत्त्वाकांक्षी चलचित्र ‘द राइज अफ साम्राज्य’ निर्माण गर्ने तयारी गरेका छन् । ‘अगस्त्यः च्याप्टर १’बाट निर्देशनमा प्रभाव जमाएका चौधरीले यसपटक मुख्य भूमिकाका लागि अभिनेता सौगात मल्ललाई अनुबन्ध गरेका हुन् ।

डार्क हर्स इन्टरटेन्मेन्टको ब्यानरमा बन्ने यो चलचित्रलाई यस वर्षको ठूलो नेपाली प्रोजेक्टका रूपमा हेरिएको छ । केही दिनअघि सार्वजनिक गरिएको थिम पोस्टरमार्फत चलचित्रको औपचारिक घोषणा गरिएको थियो । पोस्टर सार्वजनिक भएको छोटो समयमै निर्माण पक्षले सौगात मल्ललाई प्रमुख कलाकारका रूपमा प्रस्तुत गरेको हो ।

सौरभ र सौगातको सहकार्य यसअघि अगस्त्यः च्याप्टर १’मा भइसकेको थियो । उक्त चलचित्रमा सौगातको अभिनयले दर्शक र समीक्षकबाट राम्रो प्रतिक्रिया पाएको थियो । अब दोस्रो पटक उनीहरू फेरि एउटै परियोजनामा जोडिएका छन् ।

निर्देशक चौधरीका अनुसार यो कथाले अत्यन्त बलियो अभिनय क्षमता भएको कलाकार मागेको थियो, त्यसैले पहिलो रोजाइ सौगात मल्ल बनेका हुन् । अन्य कलाकारको छनोट प्रक्रिया पनि जारी रहेको उनले बताएका छन् ।

चलचित्रमा सौगातले निकै फरक र चुनौतीपूर्ण चरित्र निर्वाह गर्नेछन् । कथामा उनी २५ वर्षको युवकदेखि ८० वर्षको वृद्धसम्मको जीवन यात्रा प्रस्तुत गर्ने भूमिकामा देखिनेछन् । एउटै फिल्ममा यति ठूलो उमेर अन्तर समेटिएको पात्र नेपाली सिनेमाका लागि रोचक प्रयोग मानिएको छ ।

यस चलचित्रको कथा तथा पटकथा चर्चित लेखक बुद्धिसागरले तयार पारेका हुन् । सार्वजनिक पोस्टरमा देखिएको आगो, घोडामा सवार पात्र र ऐतिहासिक वातावरणले फिल्म भव्य ऐतिहासिक एक्सन ड्रामा हुने संकेत दिएको छ ।

निर्माण पक्षले यसलाई ठूलो स्केलको नेपाली एक्सन चलचित्र बनाउने तयारी गरेको जनाएको छ । निर्देशक चौधरीले यसपटक आफ्नो अघिल्लो कामभन्दा अझ विस्तृत क्यानभासमा फिल्म प्रस्तुत गर्ने लक्ष्य राखेका छन् ।

चलचित्रको छायांकन आगामी भदौको पहिलो सातादेखि सुरु हुने तय भएको छ । करिब ७० दिनको छायांकन तालिका बनाइएको छ, जसको अधिकांश भाग पूर्वी नेपालका विभिन्न स्थानमा खिचिनेछ ।

फिल्मका निर्माता प्रवेश चौधरी र निला देव हुन् । विश्वास बस्नेत (बेन) सह–निर्माता तथा शंकर पाण्डे कार्यकारी निर्माता रहेका छन् ।