विसं २०५७ सालमा प्रदर्शनमा आएको नेपाली चलचित्र ‘गौँथली’ ले आफ्नो समयमै ५१ दिन प्रदर्शन पूरा गरेर विशेष सफलता हासिल गरेको थियो। तत्कालीन माओवादी आन्दोलनका कारण देशभरका धेरै सिनेमा हल प्रभावित भइरहेका बेला काठमाडौंमा भने चलचित्र लामो समय टिक्न सकेको थिएन।

तर काठमाडौं बाहिरका दाङसहित तीन प्रमुख स्टेशनमा यसले ५१ दिन पूरा गर्दै उल्लेखनीय व्यापारिक उपलब्धि हासिल गरेको थियो। त्यो समय ५१ दिन मनाउने पहिलो चर्चित म्युजिकल नेपाली चलचित्रका रूपमा ‘गौँथली’ले छुट्टै पहिचान बनाएको थियो।

नयाँ पुस्ताका लागि ‘अपडेटेड गौँथली’

त्यही कथालाई नयाँ ढंगले प्रस्तुत गर्दै २६ वर्षपछि ‘गौँथली’ पुनः निर्माण गरिएको हो। मूल कथा पुनः डा. भोला रिजालकै रहेको छ भने निर्देशनको जिम्मेवारी उनका छोरा डा. कपिल रिजालले सम्हालेका छन्। ‘ह्यारी कि प्यारी’पछि यो उनको दोस्रो निर्देशकीय चलचित्र हो।

१९ करोड पार, वर्षकै सर्वाधिक कमाउने फिल्म

साउन १ गतेदेखि प्रदर्शनमा आएको यो चलचित्र अहिले नेपाली बक्स अफिसमा लगातार मजबुत प्रदर्शन गरिरहेको छ। प्रदर्शनको तेस्रो हप्तामै चलचित्रले १९ करोड रुपैयाँभन्दा बढी ग्रस कलेक्सन गरिसकेको छ, जसका आधारमा यो हालसम्म २०८३ सालकै सबैभन्दा धेरै कमाउने नेपाली चलचित्र बनेको छ।

शनिबार पनि देशभरका अधिकांश शो हाउसफुल भइरहेका छन्। व्यापारिक लय कायम रहेकाले चलचित्र अब २५ करोड क्लबतर्फ उन्मुख देखिएको छ।

दर्शकको रोजाइमा ‘गौँथली’

नयाँ रिलिज भएका अन्य चलचित्रको तुलनामा दर्शकको प्राथमिकता अझै ‘गौँथली’तर्फ देखिएको छ। विदेशी चलचित्र ‘स्पाइडर म्यान’का शो क्रमशः घट्दै जाँदा ‘गौँथली’का शो थपिँदै जानुले यसको माग अझै बलियो रहेको संकेत गरेको छ।

चलचित्रबारे सामाजिक सञ्जाल र मौखिक प्रचार (वर्ड अफ माउथ) सकारात्मक रहेकाले यसको व्यापार तत्काल घट्ने अवस्था नदेखिएको वितरकहरूको भनाइ छ।

निर्देशक कपिल रिजालको प्रतिक्रिया

निर्देशक डा. कपिल रिजाल दर्शकको साथप्रति उत्साहित देखिन्छन्।

> “हलमा पुगेपछि सिनेमा निर्माताको मात्र रहँदैन, त्यो दर्शकको हुन्छ। दर्शकले चलचित्र मन पराएर आफ्ना आफन्त, साथीभाइ र छिमेकीलाई पनि हेर्न सिफारिस गरिरहनुभएको छ। अहिलेको प्रतिक्रिया हेर्दा ‘गौँथली’ले फेरि ५१ दिन मनाउने विश्वास बढेको छ,” उनले बताएका छन्।

महिलाको उल्लेख्य उपस्थिति

सकारात्मक वर्ड अफ माउथकै कारण चलचित्रले अफ डे अर्थात् सामान्य दिनमा पनि उच्च अकुपेन्सी कायम राखेको छ। विशेषगरी महिला दर्शकको उपस्थिति उल्लेखनीय रहेको हल सञ्चालकहरू बताउँछन्।

कलाकारहरूको बलियो टोली

चलचित्रमा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना र लक्ष्मीनाथ तिमिल्सिनालगायतका कलाकारको अभिनय रहेको छ।

बाल कलाकारका रूपमा अंशु ओली र प्रिन्स नेपालीले अभिनय गरेका छन्।

पटकथा र निर्माण

डा. भोला रिजालको कथामा आधारित चलचित्रको पटकथा तथा संवाद लेखनमा निर्देशक डा. कपिल रिजालसँगै निश्चल कुँवर, निरज नेपाल र गिरिराज घिमिरेले सहकार्य गरेका छन्।

भोला रिजाल प्रोडक्सन र सुमन गिरी प्रोडक्सनको प्रस्तुतिमा बनेको चलचित्रकी कार्यकारी निर्माता सरला रिजाल हुन्। निर्माता सुमन गिरी र डा. कपिल रिजाल रहेका छन् भने इन्दु गिरी, मनिष रिजाल, प्रलय रिजाल र जीवन ओली सह–निर्माताका रूपमा आबद्ध छन्।

परिवार र सम्बन्धको कथा

घर, परिवार, सम्बन्ध र आत्मीयताको भावनालाई केन्द्रमा राखेर निर्माण गरिएको ‘गौँथली’को वितरण रिच इन्टरटेनमेन्ट, एप्पल इन्टरटेनमेन्ट र एफडी कम्पनीले गरेका छन्।

दुई दशकभन्दा बढी समयपछि पुनः ठूलो पर्दामा फर्किएको ‘गौँथली’ले पुरानो सफलताको सम्झना मात्र दिलाएको छैन, नयाँ पुस्ताका दर्शकमाझ पनि बलियो भावनात्मक सम्बन्ध स्थापित गर्दै फेरि ५१ दिनको इतिहास दोहोर्याउने संकेत देखाएको छ।