‘दान्भी’ निर्देशक रुपेश तामाङको निर्देशनमा बन्न लागेको नयाँ फिल्म ‘एक्का तीन’को फर्स्टलुक पोस्टर सार्वजनिक भएको छ । एक्सनप्रधान जनरामा निर्माण हुने फिल्मको पोस्टरमा अभिनेत्री पूजा शर्मा र कविता नेपालीलाई आमनेसामने देखाइएको छ ।

पोस्टरमा दुवै अभिनेत्रीको अनुहारमा आक्रोश देखिन्छ । पूजाको गालामा धारिलो वस्तुले काटेको जस्तो चोटको दाग छ भने कविताको निधारमा पनि घाउको निशान देखिन्छ । कविताले कम्मरमा पेस्तोल भिरेको दृश्यले फिल्ममा उनीहरूको भिडन्त निकै तीव्र हुने संकेत गर्छ । पृष्ठभूमिमा देखाइएको चट्याङले पनि दुई महिला पात्रबीचको संघर्षलाई झल्काएको छ ।

पूजा र कविता पहिलोपटक एउटै फिल्ममा सहकार्य गर्न लागेका हुन् । दुवै अभिनेत्री एक्सन भूमिकामा प्रस्तुत हुने फिल्ममा अभिनेता पुष्प खड्काको पनि मुख्य भूमिका रहनेछ । अन्य कलाकारको नाम भने निर्माण पक्षले सार्वजनिक गरेको छैन ।

दुई श्रृंखलामा निर्माण हुने ‘एक्का तीन’को पटकथा तथा संवाद सुमन गजमेरले लेखेका हुन् । उनले यसअघि ‘रंगी’को पटकथा लेखेका थिए । रामकृष्ण खरेल र अनुप गदाल निर्माता रहेको फिल्म जुना फिल्म्सको ब्यानरमा निर्माण हुनेछ ।

फिल्मको छायांकन भदौको अन्तिम साताबाट सुरु गर्ने तयारी छ । निर्माण पक्षले ‘एक्का तीन’लाई सन् २०२७ मा प्रदर्शन गर्ने लक्ष्य राखेको जनाएको छ ।