हास्य कलाकार सीताराम कट्टेल ‘धुर्मुस’ दुई महिनाको नेपाल बसाइपछि पुनः अमेरिका फर्किएका छन् । गत जेठको अन्तिम साता छोरी सुबिहानीसँगै नेपाल आएका उनी बिहीबार बिहान सामाजिक सञ्जालमार्फत आफ्नो पीडा सार्वजनिक गर्दै अमेरिका फर्किएको जानकारी दिएका हुन् ।

कट्टेलले राज्यका विभिन्न निकायमा धाउँदा पनि आफ्नो समस्या सम्बोधन नभएको गुनासो गरेका छन् । न्यायको अपेक्षासहित दुई महिना निरन्तर प्रयास गरे पनि आफ्नो आवाज नसुनिएको र समस्या समाधानतर्फ कुनै ठोस पहल नभएको उनको भनाइ छ । उनका अनुसार भरतपुर महानगरपालिकाबाट रंगशालाका लागि विनियोजित १५ करोड रुपैयाँसमेत फ्रिज हुने अवस्था बनेको छ ।

आफ्नै देशमा न्यायका लागि आवाज उठाउँदा पनि सुनुवाइ नभएको भन्दै उनले आफू निराश बनेको बताएका छन् । समाज र राष्ट्रका लागि लामो समय योगदान दिँदा राज्यबाट अपेक्षित साथ र प्रोत्साहन नपाएको उनको गुनासो छ ।

यद्यपि राज्यप्रतिको आफ्नो आशा अझै समाप्त नभएको कट्टेलले उल्लेख गरेका छन् । कुनै दिन आफ्नो संघर्ष र पीडाको मूल्यांकन हुने तथा राज्यले आफूहरूलाई सम्झिने विश्वास उनले व्यक्त गरेका छन् ।

चितवनमा क्रिकेट रंगशाला निर्माणका क्रममा धुर्मुस–सुन्तली फाउन्डेसनमाथि १८ करोड रुपैयाँभन्दा बढी ऋण दायित्व सिर्जना भएको बताइन्छ । यही ऋण फर्स्यौटको विषयलाई लिएर कट्टेलले लामो समयदेखि राज्यसँग पहल गर्दै आएका छन् । समस्या समाधान हुन नसकेपछि उनी निराश बनेका थिए ।

यसअघि उनी छोरीको उपचारका लागि अमेरिका गएको बताइएको थियो । कट्टेलले अमेरिकी ग्रीनकार्डसमेत लिइसकेको जानकारी सार्वजनिक भइसकेको छ ।