अभिनेता आकाश श्रेष्ठको चर्चा पछिल्लो समय अभिनयभन्दा बढी उनको प्रेम सम्बन्धका कारण हुने गरेको छ । विगत एक दशकमा विभिन्न अभिनेत्रीसँग उनको नाम जोडिएको थियो भने एक समय उनी एक अभिनेत्रीसँग विवाह गर्ने तयारीमा समेत रहेको चर्चा चलेको थियो । तर, उक्त सम्बन्ध लामो समय टिक्न सकेन ।

पछिल्लो पाँच वर्षदेखि भने आकाश अभिनेत्री तथा मोडल करुणा श्रेष्ठसँग प्रेम सम्बन्धमा छन् । सम्बन्धको चर्चा सुरु भएदेखि नै आकाशले लामो समयसम्म आफूहरूबीच केवल मित्रता रहेको बताउँदै आएका थिए । तर, पछिल्ला वर्षहरूमा उनका सामाजिक सञ्जालका पोस्टले भने सम्बन्धबारे फरक संकेत दिँदै आएका थिए ।

सोमबार आकाशले पहिलोपटक सार्वजनिक रूपमै करुणासँगको प्रेम स्वीकार गरेका छन् । उनले इन्स्टाग्राममा करुणासँगका दुई तस्वीर सार्वजनिक गर्दै पाँच वर्षदेखि आफूहरू सँगै रहेको उल्लेख गरेका छन् । उनले आगामी दिनहरू पनि करुणासँगै बिताउने चाहना व्यक्त गरेका छन् ।

आकाश र करुणा निकट स्रोतका अनुसार यही वर्ष विवाह गर्ने तयारीमा रहेको बताइएको छ । उनीहरूको सम्बन्धलाई दुवै परिवारको समेत स्वीकृति रहेको र दुवै एकअर्काका परिवारसँग नजिक भइसकेको स्रोतको दाबी छ । करुणा आकाशकी आमासँग काठमाडौंका विभिन्न सपिङ मलमा किनमेल गरिरहेको अवस्थामा समेत देखिँदै आएकी छन् ।

आकाश र करुणाको चिनजान म्यूजिक भिडियोमा सँगै काम गर्ने क्रममा भएको थियो । मित्रताबाट सुरु भएको सम्बन्ध विस्तारै प्रेममा परिणत भएको बताइन्छ । पछिल्लो पाँच वर्षमा उनीहरूले थुप्रै म्यूजिक भिडियोमा सहकार्य गरेका छन् ।

करुणाले म्यूजिक भिडियोमा सक्रिय हुनुअघि फिल्म ‘१०० कडा १०’बाट अभिनय यात्रा सुरु गरेकी थिइन् । आकाश भने अहिलेसम्म एक दर्जनभन्दा बढी फिल्ममा अभिनय गरिसकेका छन् ।