अभिनेत्री प्रियंका कार्कीको निर्माणमा बनेको पहिलो चलचित्र ‘मास्टर्नी’ शुक्रबारदेखि हलमा आएको छ । क्राइम थ्रिलर जनरामा तयार भएको फिल्मले देशभर ६० भन्दा बढी शो पाएको भए पनि सुरुवाती प्रदर्शनमा दर्शकको उल्लेख्य साथ देखिएको छैन ।

बिहानीका शोहरूमा देशभर फिल्मको अकुपेन्सी १० प्रतिशतभन्दा कम रहेको देखिएको छ । निर्माण पक्षले अपेक्षा गरेअनुसार दर्शकको चाप नहुँदा ‘मास्टर्नी’को सुरुवात कमजोर बनेको हो ।

प्रदर्शनअघि नै ‘म्याथ सिक्ने भए’ गीतका कारण फिल्म विवादमा परेको थियो । गीतलाई लिएर सामाजिक सञ्जालमा विरोधसँगै फिल्म बहिष्कारको अभियानसमेत चलेको थियो । विवाद बढ्दै गएपछि प्रियंकाले गीत युट्युबबाट हटाउँदै दर्शकसँग माफी मागेकी थिइन् । यद्यपि, उक्त घटनालाई लिएर अहिले पनि उनलाई सामाजिक सञ्जालमा आलोचना तथा असभ्य टिप्पणी हुने गरेका छन् ।

आफ्नो प्रोडक्सन हाउसको पहिलो फिल्म भएकाले प्रियंकाले ‘मास्टर्नी’को निर्माणदेखि प्रचारसम्म विशेष ध्यान दिएकी थिइन् । उनले प्रदर्शनअघि फिल्मको पुनः छायांकनसमेत गराएकी थिइन् । विवादित गीत हटाएपछि दर्शकलाई आकर्षित गर्ने उद्देश्यले अर्को गीत सार्वजनिक गरियो । प्रचार अभियानकै क्रममा उनी भैरहवासम्म पुगेकी थिइन् ।

तर, प्रचारमा निर्माण पक्षले गरेको निरन्तर प्रयासको तुलनामा फिल्मको प्रारम्भिक व्यापारिक प्रतिक्रिया भने उत्साहजनक देखिएको छैन ।

भारतीय मूलका निर्देशक शुभेन्दु घोषले निर्देशन गरेको ‘मास्टर्नी’मा प्रियंका कार्कीसँगै सिम्रन खड्का, आर्यन सिग्देल, गौरी मल्ल, दीपकराज गिरी, दीपाश्री निरौला, प्रमोद अग्रहरी, सरोज खनाल, जितु नेपाल, ऋचा शर्मा र अनुपविक्रम शाही लगायतका कलाकारको अभिनय छ ।

फिल्मले सेन्सर बोर्डबाट १६ वर्षमुनिका दर्शकले हेर्न नपाउने गरी ‘एडल्ट’ प्रमाणपत्र पाएको छ । अब आगामी दिनमा दर्शकको प्रतिक्रिया र सकारात्मक वर्ड अफ माउथले ‘मास्टर्नी’को व्यापार उकास्न सक्छ कि सक्दैन भन्ने चासोको विषय बनेको छ ।