हास्य टेलिभिजन कार्यक्रम ‘कमेडी दरबार’मार्फत परिचित निर्देशक तथा अभिनेत्री श्रद्धा प्रसाईं पछिल्लो समय फिल्म निर्देशनमा समेत सक्रिय हुँदै गएकी छन् । उनको पहिलो निर्देशकीय फिल्म ‘ककाकिकी’ आगामी भदौ १९ गते प्रदर्शनमा आउँदैछ ।

फिल्म निर्देशनमा उनको व्यस्तता यतिमै रोकिएको छैन । अभिनेत्री रेखा थापाले निर्माण गर्न लागेको कमेडी फिल्म ‘काउकुती’को निर्देशनको जिम्मेवारी पनि श्रद्धाले पाएकी छन् । उक्त फिल्म यसै वर्ष निर्माण गर्ने तयारीमा छ ।

तर, ‘काउकुती’अघि नै श्रद्धाले अर्को फिल्म ‘डियर काव्या’को निर्देशन सम्हाल्ने भएकी छन् । बिहीबार काठमाडौंको विजेश्वरीस्थित होटल बज्रमा आयोजित कार्यक्रममा फिल्म निर्माणको औपचारिक घोषणा गरिएको हो । सोही अवसरमा फिल्मको ३० फिट लामो फर्स्टलुक पोस्टरसमेत सार्वजनिक गरियो ।

आगामी मंसिरमा छायांकनमा जाने तयारीमा रहेको फिल्ममा उपासना सिंह ठकुरी र विक्की शमशेर खड्का मुख्य भूमिकामा रहनेछन् । थिएटरमा सक्रिय विक्कीले ‘डियर काव्या’बाट फिल्ममा डेब्यू गर्न लागेका हुन् ।

फिल्ममा गौरी मल्ल, तृप्ति नाडकर, अनुप बराल, सन्तोष थापा तथा खड्गबहादुर पुन मगर (खबपु) लगायतका कलाकारको पनि अभिनय रहनेछ ।

गोल्डेन वल्फ पिक्चर्सको ब्यानरमा देवी सिंह र हेमकुमारी भेटुवालले फिल्म निर्माण गर्नेछन् । दीया मास्के र सन्दीप दंगोल कार्यकारी निर्माता छन् । अभिनेत्री दीयाले यही फिल्ममार्फत निर्माणमा समेत पाइला चाल्न लागेकी हुन् । यद्यपि, उनको अभिनय रहने वा नरहनेबारे निर्माण पक्षले खुलाएको छैन ।

‘डियर काव्या’को छायांकन नेपालगन्जमा गर्ने तयारी भइरहेको छ । ‘ककाकिकी’पछि लगातार दुई फिल्मको निर्देशन जिम्मेवारी पाएकी श्रद्धाको करिअरमा ‘डियर काव्या’ अर्को महत्वपूर्ण परियोजनाका रूपमा हेरिएको छ ।