बलिउड अभिनेता तथा समाजसेवी सोनू सूद नेपालका बाढी प्रभावितको सहयोगका लागि काठमाडौं आइपुगेका छन् । आफ्नो ‘सूद च्यारिटी फाउन्डेसन’को टोलीसहित उनी मंगलबार दिउँसो त्रिभुवन अन्तर्राष्ट्रिय विमानस्थलमा अवतरण गरेका हुन् ।

रसुवाको भोटेकोशी नदीमा आएको विनाशकारी बाढीबाट ठूलो जनधनको क्षति भएपछि सूदले सामाजिक सञ्जालमार्फत नेपाल आएर प्रभावितलाई सहयोग गर्ने प्रतिबद्धता जनाएका थिए । बाढीपीडितका लागि खाना, आश्रय तथा पुनर्निर्माणमा आवश्यक सहयोग गर्ने उनको भनाइ थियो ।

काठमाडौं विमानस्थलमा उनलाई सिख धर्मावलम्बीहरूको अन्तर्राष्ट्रिय गैरनाफामूलक संस्था ‘खाल्सा एड’का प्रतिनिधिले स्वागत गरेका थिए । सूदको नेपाल भ्रमणमा बाढी प्रभावित क्षेत्रमा राहत तथा पुनर्निर्माणका सम्भावित कामलाई प्राथमिकता दिइने बताइएको छ ।

सूद भारतमा अभिनयसँगै सामाजिक सेवाका कारण पनि चर्चित छन् । कोरोना महामारीका बेला भारतमा लकडाउन भएपछि अलपत्र परेका हजारौं मजदूरलाई उनले आफ्नै खर्चमा बस, रेल तथा चार्टर्ड विमानमार्फत घर फर्काउन सहयोग गरेका थिए । त्यसपछि पनि विभिन्न संस्थासँग सहकार्य गर्दै उनले रोजगारीलगायतका अवसर उपलब्ध गराउँदै आएका छन् ।

अभिनयतर्फ भने सोनू सूदले एक सयभन्दा बढी भारतीय चलचित्रमा काम गरिसकेका छन् । विशेषगरी खलनायक अर्थात् नकारात्मक भूमिकामा लोकप्रिय रहेका उनले ‘अरुन्धती’, ‘जोधा अकबर’, ‘दबंग’, ‘सिम्बा’, ‘आर. राजकुमार’ र ‘ह्याप्पी न्यू इयर’ लगायतका चलचित्रमा अभिनय गरेका छन् ।

हिन्दी चलचित्रसँगै उनले तेलुगु, तमिल, कन्नड, मलयालम र चिनियाँ भाषाका चलचित्रमा समेत काम गरिसकेका छन् । यसपटक भने उनी कलाकारका रूपमा नभई विपद्मा परेका नेपालीका लागि सहयोगी बनेर काठमाडौं आइपुगेका हुन् ।