विश्वका प्रतिष्ठित फिल्म फेस्टिभलमा आफ्नो उपस्थिति जनाउँदै अवार्डसमेत जितेको नेपाली चलचित्र ‘तीनीहरू : एलिफेन्ट्स इन द फग’ अब नेपाली दर्शकमाझ आउने तयारीमा छ । भदौ १९ गतेबाट प्रदर्शनमा आउने यो चलचित्रलाई लिएर दर्शकमाझ यसको कथा र विषयवस्तुबारे उत्सुकता बढेको छ ।

चलचित्रको शीर्षकले नै हात्तीको कथातर्फ संकेत गरे पनि ‘तीनीहरू’ केवल हात्तीमा केन्द्रित चलचित्र भने होइन । निर्माण पक्षका अनुसार फिल्ममा हात्तीलाई एउटा पात्रसँगै शक्तिशाली विम्बका रूपमा प्रस्तुत गरिएको छ ।

निर्माता अनुप पौडेलका अनुसार हात्तीमार्फत समाजले सीमान्तकृत समुदाय र उनीहरूमाथि निर्माण गरेका सामाजिक सीमालाई चित्रण गर्न खोजिएको छ । प्रकृति, महिला तथा सीमान्तकृत समुदायमाथि समाजले बनाएका नियन्त्रण र सीमासँग हात्तीको कथालाई जोडिएको उनको भनाइ छ ।

रोचक कुरा त के छ भने चलचित्रको ट्रेलरमा हात्तीलाई देखाइएको छैन । निर्माण पक्षले यो निर्णय जानाजानी गरिएको जनाएको छ । ट्रेलरमै हात्ती देखाएर कथाको महत्वपूर्ण पक्ष खुलाउनुभन्दा दर्शकले चलचित्र हेर्दा त्यसको अर्थ र अनुभव आफैं महसुस गरून् भन्ने उद्देश्य रहेको बताइएको छ ।

ट्रेलरले भने मुख्य पात्र पिरती, उनकी छोरी र उनीहरूको संसारलाई केन्द्रमा राखेको छ । जंगली हात्तीको आतंकबाट प्रभावित बस्तीमा बसोबास गर्ने अल्पसंख्यक समुदायको जीवन र उनीहरूले भोगिरहेको सामाजिक यथार्थलाई चलचित्रले कथाको आधार बनाएको छ ।

अविनाश विक्रम शाह निर्देशित चलचित्रको पटकथा पनि शाहकै हो । कथा भने अविनाश विक्रम शाह र सन्दीप बादलको रहेको छ । कान्सलगायत अन्तर्राष्ट्रिय फिल्म फेस्टिभलमा छनोट हुँदै कान्समा जुरी च्वाइस अवार्डसमेत प्राप्त गरेपछि चलचित्र घरेलु दर्शकमाझ थप प्रतीक्षित बनेको हो ।

चलचित्रमा गौरी मल्ल, माओत्से गुरुङ, पुष्पा थिङ लामा, दीपिका यादव, जस्मिन विश्वकर्मा, एलिज घिमिरे, महिमा नवबाग र आकांक्षा कार्कीलगायत कलाकारको अभिनय छ ।

नेपाल, फ्रान्स, जर्मनी, ब्राजिल र नर्वेका निर्माण संस्थाको सहकार्यमा बनेको यो चलचित्रले अन्तर्राष्ट्रिय यात्रापछि अब नेपाली दर्शकको प्रतिक्रिया पर्खिरहेको छ ।

यसैबीच निर्माण पक्षले भोटेकोसी बाढीपीडितका लागि सहयोगको घोषणा पनि गरेको छ । नेपाल प्रिमियरमा आमन्त्रित दर्शकबाट उठ्ने अनुमानित ७ लाख रुपैयाँ तथा निर्माताहरूको तर्फबाट थप २ लाख रुपैयाँ प्रधानमन्त्री दैवी प्रकोप उद्धार कोषमा जम्मा गर्ने जनाइएको छ । चलचित्रका अन्तर्राष्ट्रिय सह–निर्माताहरूले समेत बाढी प्रभावितका लागि सहयोग जुटाउने निर्देशक शाहले बताएका छन् ।

अन्तर्राष्ट्रिय फेस्टिभलमा पाएको सफलता र सामाजिक विषयवस्तुका कारण चर्चामा रहेको ‘तीनीहरू : एलिफेन्ट्स इन द फग’ले घरेलु दर्शकलाई कस्तो सिनेम्याटिक अनुभव दिन्छ, त्यसको उत्तर भने भदौ १९ पछि नै पाइनेछ ।