फिल्म प्रदर्शनमा आउनुअघि नै त्यसलाई ‘ब्लकबस्टर’ घोषणा गर्ने चलन विश्व सिनेमामा विरलै देखिन्छ। तर, नेपाली फिल्म  ‘मास्टर्नी’ को प्रचारका क्रममा अभिनेत्री तथा निर्मात्री प्रियंका कार्कीले भने रिलिजअघि नै फिल्मलाई ‘ब्लकबस्टर’को ट्याग दिएकी थिइन्।

फिल्मको टिजरमै ‘२०२६ को सबैभन्दा ठूलो ब्लकबस्टर’ लेखिएपछि यसको चर्चा चुलिएको थियो। दर्शकको ध्यान खिच्ने उद्देश्यले गरिएको उक्त प्रचार रणनीति भने अपेक्षितभन्दा फरक दिशामा गयो। फिल्मभन्दा बढी प्रियंकाको यो दाबीमाथि सामाजिक सञ्जालमा व्यंग्य र आलोचना हुन थालेपछि त्यसपछिका प्रचार सामग्रीमा ‘ब्लकबस्टर’ शब्द देखिएन।

रिलिजअघि फिल्मप्रति मिश्रित प्रतिक्रिया भए पनि चर्चा भने राम्रै थियो। त्यसैले निर्माण पक्ष फिल्मले राम्रो व्यापार गर्नेमा आशावादी देखिन्थ्यो। तर, भदौ ५ गतेबाट प्रदर्शनमा आएपछि बक्स अफिसको परिणाम भने ठीक उल्टो देखिएको छ।

चलचित्र विकास बोर्डको तथ्यांकअनुसार १७ दिनमा ‘मास्टर्नी’ले घरेलु बजारमा जम्मा ४० लाख १५ हजार रुपैयाँ ग्रस व्यापार गरेको छ। यो आँकडाले फिल्मलाई व्यावसायिक रूपमा निकै कमजोर प्रदर्शन गर्ने फिल्मको सूचीमा पुर्‍याएको छ। उक्त कारोबारबाट निर्मात्री प्रियंकाको हातमा आउने रकम करिब १७–१८ लाख रुपैयाँ आसपास मात्र हुने अनुमान गरिएको छ।

फिल्मको कमजोर व्यापारका पछाडि मुख्यतः दुई कारणलाई जिम्मेवार मानिएको छ। पहिलो हो, फिल्ममा समावेश ‘म्याथ सिक्ने भए’ गीतलाई लिएर उत्पन्न विवाद। गीत सार्वजनिक भएपछि सामाजिक सञ्जालमा फिल्म बहिष्कारको अभियानसमेत चलेको थियो। त्यसको प्रत्यक्ष असर फिल्मको दर्शक उपस्थितिमा परेको विश्लेषण गरिएको छ।

त्यस्तै, फिल्मको कथा हिन्दी चलचित्र **‘दृश्यम’**सँग मिल्दोजुल्दो रहेको चर्चा पनि यसको व्यापार प्रभावित गर्ने अर्को कारणका रूपमा हेरिएको छ। कथावस्तुको समानताबारे उठेको प्रश्नले फिल्मको सकारात्मक प्रचारलाई कमजोर बनाएको बताइन्छ।

यद्यपि, बक्स अफिसमा कमजोर प्रदर्शन गरे पनि ‘मास्टर्नी’का निर्मातालाई लगानीको हिसाबले ठूलो क्षति नहुन सक्ने देखिन्छ। फिल्ममा प्रियंकासँगै अन्य लगानीकर्ताहरू पनि जोडिएका छन्। अग्नि ग्रुपका अध्यक्ष क्याबिनेट श्रेष्ठ पनि यसका निर्मातामध्ये एक हुन्। विभिन्न ब्रान्डको सहकार्य रहेकाले फिल्मको लगानीको केही हिस्सा प्रचार तथा ब्रान्ड साझेदारीबाटै उठिसकेको हुनसक्ने देखिन्छ।

तर, आर्थिक जोखिम तुलनात्मक रूपमा कम भए पनि रिलिजअघि नै ‘ब्लकबस्टर’को दाबी गरिएको फिल्मले हलमा अपेक्षित व्यापार गर्न नसक्नु भने प्रियंका कार्कीका लागि ठूलो व्यावसायिक र प्रचारात्मक झड्का बनेको छ।