अभिनेता निखिल उप्रेती निर्देशकीय भूमिकामा फर्किएको चलचित्र ‘आचार्य’को पहिलो गीत ‘लै बरी लै’ सार्वजनिक भएको छ । असोज ९ गतेदेखि प्रदर्शनमा आउने तयारीमा रहेको चलचित्रको गीतमा युग भुसालको शब्द तथा संगीत छ । गीतमा भारतीय गायक गौरांग शेखर शर्मा र ज्योत्सना जावडाको स्वर रहेको छ ।

सार्वजनिक गीतको भिडियोमा निखिल उप्रेती र सजिना श्रेष्ठलाई प्रेमिल अवतारमा प्रस्तुत गरिएको छ । सौरभ लामाले खिचेको गीतलाई किरण थापाले कोरियोग्राफी गरेका हुन् । भिडियोमा दुवै कलाकारको नृत्यलाई प्राथमिकता दिइएको छ भने निर्माण पक्षले दृश्यलाई आकर्षक बनाउने प्रयास गरेको देखिन्छ ।

यद्यपि, निखिल र सजिनाबीचको रोमान्टिक केमेस्ट्री भने त्यति स्वाभाविक देखिँदैन । विशेषगरी दुई कलाकारबीचको उमेर अन्तरले पर्दामा उनीहरूको जोडीलाई केही असहज बनाएको महसुस हुन्छ । तर, छायांकन, लोकेसन र कोरियोग्राफीका हिसाबले गीतको मेकिङ भने स्तरीय देखिन्छ ।

निखिल उप्रेती प्रोडक्सनको ब्यानरमा निर्माण भएको चलचित्रमा निखिल र सजिनासँगै प्रमोद अग्रहरी, सञ्जय गुप्ता, रोहित चौधरी, ध्रुव कोइराला र सरिता ज्ञवालीको अभिनय छ । भारतीय कलाकार दीपराज राणा, रघु बाबु र रघू कारुमन्चीलगायत पनि चलचित्रमा देखिनेछन् । चलचित्रमार्फत पूर्णिका सिंजापतिले अभिनेत्रीका रूपमा डेब्यू गर्दैछिन् ।

निखिल उप्रेती स्वयंको लेखन रहेको चलचित्रका निर्माता कृष्ण भट्टराई र कार्यकारी निर्माता मिथिलेश तिवारी हुन् । चलचित्रमा मनु विश्वकर्मा, नवराज कृष्ण थापा र सौरभ लामाको छायांकन, बन्दे प्रसादको सम्पादन तथा शुक्रराज शाहको द्वन्द्व निर्देशन छ ।

युग भुसालले संगीत दिएको चलचित्रमा दक्षिण भारत (तमिल)का कालाचरणको पार्श्व संगीत छ । नृत्य निर्देशन गम्भीर विष्ट र किरण थापाले गरेका छन् ।