एभरेष्ट सूर्य बोहराको निर्देशनमा तयार भएको फिल्म ‘चमेलीको पोइ’को ट्रेलर सार्वजनिक भएको छ। आइतबार काठमाडौंमा आयोजित एक कार्यक्रमबीच सार्वजनिक गरिएको करिब चार मिनेट लामो ट्रेलरले फिल्मको कथा, पात्र र उनीहरूबीचको द्वन्द्वलाई हास्यप्रधान शैलीमा प्रस्तुत गरेको छ।

मुस्ताङको रमणीय परिवेशलाई पृष्ठभूमि बनाइएको फिल्मले चार पात्रको सम्बन्ध र उनीहरूको जीवनमा आइपर्ने प्रेम, वियोग तथा झगडाको कथा समेटेको छ। ट्रेलर हेर्दा फिल्म मुख्यतः कमेडीमा आधारित रहेको बुझिन्छ।

ट्रेलरमा सुरक्षा पन्तलाई आफ्नो बनाउन चाहने तीन युवाको प्रयास र त्यसबाट सिर्जना हुने परिस्थितिलाई हास्य शैलीमा देखाइएको छ। सुरक्षाको कडा स्वभाव र पुरुष पात्रहरूसँगको झगडा तथा कुटपिटका दृश्यले ट्रेलरमा थप मनोरञ्जन थपेका छन्।

ट्रेलरले सुरक्षा पन्त र मुकुन भुसाल श्रीमान्–श्रीमतीको भूमिकामा रहेको जानकारी पनि दिएको छ। यी पात्रको सम्बन्ध, अन्य युवाको प्रेम प्रयास र त्यसबाट उत्पन्न परिस्थितिले फिल्मको कथालाई अघि बढाउने देखिन्छ।

असोज १६ गतेदेखि प्रदर्शनमा आउने फिल्ममा सुरक्षा र मुकुनसँगै विल्सन विक्रम राई, उमेश राई ‘फुलन्देकी आमा’, रवीन्द्र झा, गणेश गौतम, अंशु महर्जन, बविन राई, प्रेम देव गिरी र खड्गबहादुर पुनलगायत कलाकारको अभिनय छ। ‘प्रेम चरो’का रूपमा परिचित नारायण त्रिपाठीले यही फिल्ममार्फत करिब दुई दशकपछि अभिनयमा पुनरागमन गरेका छन्।

धनलक्ष्मी सिने मेकर्सको प्रस्तुतिमा बनेको फिल्मका निर्माता सुनिता सापकोटा र राम नारायण उपाध्याय हुन्। उदय विक्रम राणा, रितु मल्ल कुँवर, सुमित्रा थापा र कपिल आचार्य कार्यकारी निर्माता रहेका छन्।

फिल्मको सम्पादन बन्दे प्रसादले गरेका छन् भने कथा तथा पटकथा एभरेष्ट सूर्य बोहरा र शिवम् अधिकारीको हो। सहास शाक्यले पार्श्व ध्वनी र कुमार महर्जनले द्वन्द्व निर्देशन गरेका छन्।