संगीतकार तथा गायक टंक बुढाथोकीको निर्देशनमा बन्न लागेको नयाँ फिल्म ‘मन बिनाको धन २’मा एक पछि अर्को कलाकार थपिने क्रम जारी छ । यसले गर्दा कलाकारको लाइनअप बलियो बनेको छ । पूजा शर्मा, महेश त्रिपाठी, सरोज खनाल, किरण केसी यस अघि नै अनुबन्धित भइसकेका छन भने अब अभिनेता विपिन कार्कीको प्रवेश भएको छ । मंगलबार उनीसँग निर्देशक बुढाथोकीले लिखित सम्झौता गरेका हुन् । फिल्ममा विपिनको के हुने त्यो वारे निर्माण टिमले केही जानकारी गराएको छैन । तर फिल्मका लागि उनले आकर्षक पारिश्रमिक बुझेको जनाइएको छ ।
टंक बुढाथोकी प्रोडक्सनको ब्यानरमा निर्माण हुने फिल्मको कथा टंक स्वयंको हो भने पटकथा तथा संवाद शिवम् अधिकारीले तयार पारेका छन् । फिल्ममा बुढाथोकी स्वयंको संगीत रहनेछ । भदौ पहिलो साताबाट छायांकन सुरु गर्न लागिएको फिल्मलाइ विष्णु माया मैनालीले निर्माण गरेकी हुन ।
‘मन बिनाको धन’ संगीतकार बुढाथोकीको चर्चित गीतमध्ये एक हो । करिब ७ वर्षअघि रिलिज भएको यस गीतलाई अहिलेसम्म युट्युबमा तीन करोडभन्दा बढी पटक हेरिसकिएको छ । यो बाल गायक अशोक दर्जीको पहिलो गीत समेत हो । यही नामको यस अघिको फिल्ममा अशोक मुख्य भूमिकामा थिए । तर अव वन्ने फिल्ममा उनको अभिनयबारे कुनै जानकारी गराइएको छैन ।