दर्शकबाट सकारात्मक प्रतिक्रिया बटुल्दै नेपाली चलचित्र ‘गौँथली’ प्रदर्शनको दोस्रो सातामा प्रवेश गरेको छ । पहिलो सातादेखि नै राम्रो ‘वर्ड अफ माउथ’ पाएको चलचित्रले अहिले देशभरका हलमा आफ्नो उपस्थिति थप बलियो बनाइरहेको छ ।

रिलिजको सुरुवातमा करिब २०० शो पाएको चलचित्रले अहिले २५० भन्दा बढी शो प्राप्त गरिसकेको छ । अधिकांश हलमा दर्शकको उपस्थितिले उत्साहजनक व्यापार भइरहेको जनाइएको भए पनि निर्माण टिमले आधिकारिक बक्स अफिस विवरण भने सार्वजनिक गरेको छैन ।

निर्देशक डा. कपिल रिजालका अनुसार चलचित्र विकास बोर्डले प्रत्येक सोमबार आधिकारिक बक्स अफिस तथ्यांक सार्वजनिक गर्ने भएकाले निर्माण पक्षले त्यसअघि कुनै आँकडा सार्वजनिक नगरेको हो । उनका अनुसार यसपटक चलचित्रको व्यापार अपेक्षाभन्दा पनि राम्रो रहेको संकेत देखिएको छ ।

पहिलो दिन सामान्य देखिएको दर्शक सहभागिता त्यसपछि क्रमशः बढ्दै गएको छ । धेरै हलमा शो हाउसफुलसम्म पुगेका छन् भने कलाकारसहितको टोली काठमाडौं र मोफसलका विभिन्न हल पुगेर दर्शकसँग प्रत्यक्ष भेटघाट गर्दै प्रतिक्रिया संकलन गरिरहेको छ ।

दर्शकले चलचित्रलाई मौलिक नेपाली कथा र पारिवारिक भावनाले भरिएको फिल्मका रूपमा प्रशंसा गरिरहेका छन् । एउटै परिवारका १०–१५ जनासम्म समूहमा चलचित्र हेर्न आउने क्रम बढेको निर्माण पक्षको दाबी छ । विशेषगरी महिला दर्शकको आकर्षण उल्लेखनीय देखिएको छ ।

‘गौँथली’मा अरुण क्षेत्री, सिम्रन खड्का, मदनकृष्ण श्रेष्ठ, प्रकाश घिमिरे, लुनिभा तुलाधर, रवीन्द्र झा, ईश्वरी बराल, सञ्जोग रसाइली, सीतादेवी तिमिल्सिना र लक्ष्मीनाथ तिमिल्सिनालगायत कलाकारको अभिनय रहेको छ ।

डा. भोला रिजालको कथामा आधारित चलचित्रको पटकथा तथा संवाद डा. कपिल रिजाल, निश्चल कुँवर, नीरज नेपाल र गिरिराज घिमिरेले संयुक्त रूपमा तयार गरेका हुन् । घर, परिवार, सम्बन्ध र आत्मीयताको भावलाई केन्द्रमा राखिएको यस चलचित्रको वितरण रिच इन्टरटेनमेन्ट, एप्पल इन्टरटेनमेन्ट र एफडीले गरेका छन् ।