दशैंको अवसर पारेर आगामी असोज १७ गते (घटस्थापना) देखि प्रदर्शनको तयारीमा रहेको फिल्म ‘बेहुली फ्रम मेघौली’को ट्रेलर सार्वजनिक गरिएको छ । सार्वजनिक गरिएको ३ मिनेट लम्बाईको ट्रेलरमा ३० वर्ष नकट्दै छोरीको विवाह गराउनुपर्ने दबाबमा रहेको एक परिवारको कथालाई देखाइएको छ । भ्रामरी दशाकालले समात्ने भएकाले ३० वर्ष नकट्दै बिहे गर्नुपर्ने ज्योतिषको सुझावपछि अभिनेत्री स्वस्तिमा खड्कालाई परिवारबाट विवाहको दबाब बढ्छ । तर, उनलाई परिवारले देखाएका कुनै केटा मन पर्दैन । उनले निश्चल बस्नेतलाई मन पराएकी हुन्छिन्, तर निश्चलले अरू नै युवतीलाई मन पराउँछन् । यो अवस्थामा स्वस्तिमाको पात्रले गर्ने संघर्षलाई ट्रेलरमा हास्य शैलीमा देखाइएको छ ।
साजन काफ्ले र आकाश बरालको लेखन तथा निर्देशनमा बनेको यो फिल्ममा निश्चल र स्वस्तिमासहित विजय बराल, सिरु बिष्ट, सिम्रन खड्का, आमिर गौतम, बसुन्धरा भुषाल, टीका पहारी, लुनिभा तुलाधर लगायतको अभिनय रहेको छ । फिल्मलाइ स्वस्तिमा र निश्चलले वनाएका हुना ।
फिल्ममा नरेन्द्र मैनालीको छायांकन, प्रदीप लामा र केवीका खत्रीको नृत्य निर्देशन, जयन जे वाइवा र कुशल पोखरेलको संगीत तथा निमेष श्रेष्ठको सम्पादन छ ।