फिल्मको पव्लिसिटीमा गीत, टिजर वा ट्रेलरको प्रयोग गरिरहेको अहिलेको अवस्थामा फिल्म ‘दुःखी आत्मा’को टिमले फरक प्रयोग गर्दै ‘ब्रेकअप कविता’ नाम दिएर एक भिडियो सार्वजनिक गरेको छ । भिडियोमा फिल्मका मुख्य अभिनेता दयाहाङ राईले अभिनेत्री आँचल शर्मालाई कविता पढेर सुनाइरहेका छन् । कविताले सहमतिमा प्रेम सम्बन्ध टुंग्याएका जोडीको भाव अभिव्यक्त गर्छ । यसबाट दयाहाङको पात्र फिल्ममा कवि रहेको प्रष्ट बुझिन्छ भिडियोमा दयाहाङ र आँचलबीचका प्रेमिल दृश्यहरु पनि छन् । केही दृश्यमा भने दयाहाङलाई निराश भावमा देख्न सकिन्छ ।
आगामी फागुन २ गतेबाट प्रदर्शनमा आउन लागेको यो फिल्मलाइ दीपेन्द्र लामाले निर्देशन गरेका हुन । हिमाल कडरियाले निर्माण गरेको यो फिल्ममा दयाहाङ र आँचलसहित अनुप विक्रम शाही, वुद्दि तामाङ, रेयर राई, पुष्कर गुरुङ, कविता आले लगायतको अभिनय रहेको छ ।
केही दिनअघि सार्वजनिक टिजरले दर्शकमाझ ‘दुःखी आत्मा’को राम्रो हाइप बनाएको थियो । यौन आकर्षण र दुर्बलताको कथा पेस गरिएको टिजरमा दयाहाङको पात्र इरेक्टाइल डिसफंक्शन अर्थात् नपुंसकता (सम्भोगको क्रममा उत्तेजना नहुनु) समस्याबाट पीडित देखिन्छ ।